Shillong, Rymphang 18 : U Myntri Rangbah ka Jylla Conrad K Sangma ha ka sngi Balang ula kynnoh ba ka jingpulom ban pynieng ia ki Entry-Exit Point ha Jylla Meghalaya ka dei namar ka jingbakla jong ka Sorkar barim ha u snem 2016.
“Mynta kum ki nongthaw ain, ngi tip ba phim lah ban don kaei kaei ha ka rules ka bym shym la pruid dak ha ka Ain” ong u Conrad, haba kdew ia ka Meghalaya Residents, Safety and Security Act (MRSSA), 2016.
“U LO u tip kum u CM ba mynshuwa ba ki Entry-Exit Point kim shym la don kat kum ka MRSSA Act, hynrei la shu tyrsat ha ka rules ban pyntreikam ia ka MRSSA, bad kumta, kam shym lah kyrda ia ka jingshah bishar ha ka Iingkashari” ula ong.
U Myntri Rangbah ula ban jur ba ka rule ka don ia ka kyndon jong ka Entry-Exit Point, hynrei ia kine ym shym la kyrshan pat da ka Act, kaba buh ha ka jingeh ban pyntreikam ia ki.
U Nongialam ka Liang Pyrshah Mukul Sangma ula pyrshah ia kane ka jingkam u CM bad ong ba ka jingshem jong ka Iingkashari Meghalaya High Court ka dei halor ki facilitation centre.
Ka jingong ka Iingkashari ka long ba ha ka jingbym don ki kyndon kiba biang ban pyntreikam ia kine ki facilitation centre…u (CM) la ialambakla ia ka Iingdorbar ba ka MRSSA kam lah ieng rasong ha ka jingbishar jong ki Iingkashari” ula ong
U Conrad ula ieng skhem ba ula kdew tang ia ka mat ba iadei bad ka Entry-Exit Point ba khlem kynthup ha ka Act. “Nga la ong shai kdar ba ka Entry-Exit gate kim don ha ka Act hynrei ki don tang ka rules…Kino kino kiba don ha ka rule ki dei ban kyrshan da ka Act”.
U Myntri Rangbah ula mynjur ban wanrah ia ka hukum jong ka Iingkashari Meghalaya High Court bad ki kot ki sla kiba don jingiadei, kynthup ka MRSSA Act bad ka Rules, ban pynshai ia ka jinglong jingman.
“Ngin sa wanrah ia ka bad ngin sa wanrah ia ki kyndon ba kren shaphang kane ha ka rules bala thaw da ka Sorkar barim bad ruh ia ka Act ban pyni ba kam shym don satia kano kan ka kyndon ha ka Act ban pynieng ia ki Entry-Exit Point” ong u Conrad.
