Shillong, Risaw 27 : U Rev Fr. Joh Madur, u Lyngdoh Katholic bala rangbah bha, uba shakri kum u Diocesan Administrator jong ka Archdiocese ka Shillong, ula khlad noh ha Nazareth Hospital, Shillong ha ka janmiet sngi Ba-ar, ha ka rta ba 67 snem.
U Fr Madur ula dkut mynsiem ha ka por 2:50 baje janmiet jong ka 27 tarik Risaw, ong ka jingpynbna bala pynmih da ka Archdiocese ka Shillong.
Ia u Fr Madur la kha ha ka 10 tarik Nohprah, 1958 bad la pynkyntang Lyngdoh ia u ha ka 20 tarik Nohprah, 1987.
U la shakri kum u Diocesan Administrator hadien ka jingkhlad noh jong u Archbishop Dominic Jala ha u Risaw 2019. U la bat ïa kane ka kam haduh u snem 2021, ha kaba ka Archdiocese ka la ïaid lyngba ïa ka por jong ka jingkylla ha ka jingïalam. U la shakri ruh kum u Vicar General bad Chancellor jong ka Archdiocese.
Nalor ki kam shakri niam, u Fr. Madur u la don bynta ruh ha ki kam ban kyntiew ïa ka jingïasngewthuh jingmut bad ka jingïatylli hapdeng ki niam bapher bapher. U la shakri kum u Vice-President jong ka Shillong All Faiths Forum, kaba wanrah lang ïa ki nongïalam niam bapher bapher ban kyntiew ïa ka jingsuk, ka jingïasngewthuh markylliang bad ka jingïatreilang hapdeng ki jaitbynriew.
Ha ka jingpynbna sngewlem ba la pynmih da ka Archdiocese Shillong lyngba u Archbishop Most Rev. Victor Lyngdoh, ka Archdiocese of Shillong ka la pynpaw ïa ka jingsngewsih kaba khraw halor ka jingkhlad noh jong u Fr. Madur.
Ka Archdiocese ka la khot ïa ki nongïalam niam, ki lyngdoh, ki riewngeit bad ki paralok jong u ban wan ïashim bynta ha ki jingïaseng duwai bad ban duwai na ka bynta ka jingjahthait bymjukut jong ka mynsiem jong u.
Yn pynlong ïa ka Requiem Mass kaba ïashim bynta lang da ki Lyngdoh ha Archbishop’s House, Laitumkhrah, Shillong ha ka sngi Ba-ar.
