Shillong, Rymphang 12 : Ka Congress kala pynkhreh shaid shaid ban pynieng kyrtong na baroh 29 tylli ki constituency ha ka elekshon ban wan ka Garo Hills Autonomous District Council (GHADC).
U President ka Meghalaya Pradesh Congress Committee Bah Vincent H Pala ula pynbna ruh ba ka party kan ieng iakhun hi marwei ha kane ka elekshon khlem ka jingiatehlok badno badno ruh.
“Ka party kan iakhun na baroh 29 seat. Ngim don jingiateh lok bad kiwei pat ki party. Ngin iakhun hi marwei ha kane ka elekshon ban wan” ong u Bah Pala haba iakren bad ki nongthoh khubor ha ka sngi Palei.
Ula pyntip ba ka party kala ioh pdiang haduh 67 tylli ki aplikeshon na ki kyrtong ba pan ticket, bad tang uwei ula weng noh ialade bad sa uwei ia uba la khmih lynti ban sa weng noh, kaban ieh mynta sa 65 ngut ban hap jied.
“Ngin sa pynbna ia ki kyrtong hadien ba ka Sorkar kala pynmih ia ka jingpynbna ia ka elekshon- kane ka dei ka rukom kaba ju leh da ka party” ong u Bah Pala.
Une u Heh ka Congress ula pynpaw ruh ia ka jingsngewskhem ha ka jingpynkhreh ka party bad ong “Ngi long kiba la khreh ban leit sha ka elekshon. Ki briew jong ngi kila don sha ki lyngka bad kyrmen skhem ba ngin leh bha”.
.){kind=link}