Shillong, Risaw 19 : Ka Meghalaya Unifies Teachers Association (MUTA) kan pynlong ia ka jingialang bah ha madan Student Jaiaw, ha ka 24 tarik Risaw, ban iakren halor ki jingdawa ban kynthup lang ia ki nonghikai SPF hapoh ka Sixth Pay Commission bad kiwei ki jingai jingshakri.
Ka MUTA, kaba dei ka synjuk ki nonghikai kiba hap hapoh ka Structured Pay Framework (SPF), kila khot ia baroh ki nong hikai SSA (Lower & Upper Primary), ki nonghikai RMSA ( Secondary & Higher Secondary), nonghikai Adhoc (Lower, Upper, Secondary, Higher Secondary bad Secondary Morning/Night) lem bad ki nonghikai 4th Teacher (SSA Upper Primary), sha ka jingialang.
Ka jingialang kan iakren halor ki mat jingdawa kiba la pynsngew sha ka Sorkar ha ki arsien shong jingialang bala dep- bad ka Tnad Pule Puthi myn ha ka 16 tarik Nailur lem bad u Myntri Rangbah Conrad K Sangma ha ka 13 tarik Risaw, 2026.
Ki jingdawa ki kynthup ia ka jingkynthup lang ia ki nonghikai SPF hapoh ka Sixth Pay Commission, ban pynmih jingpynbna ia ka rukom ai jingshakrisha ki nonghikai SPF (ka hok ioh shuti ba kumjuh bad ki jingmyntoi ia ki longkmie ba kha khun, ki jingmyntoi ha ka koit ka khiah, ka ram bad ki jingmyntoi, ka song ba kyrpang ia ki nonghikai bala rangbah bad ka single instalment ha ka jingpynlait ia ka tulop sha ki nonghikai SSA bad RMSA.
“Ka Seng kala dawa ruh ban pynbeit ryntih ia ka rukom siew ban pynthikna ba ia ki tulop la siew man u bnai bad khlem ka jingpynslem man u bnai hapoh ka sngi ba nyngkong jong u bnai.
Ka MUTA ka ong ba kane ka jingialang kan ai jingshai ruh ia ki nongrim bad ki jingthmu ha lyndet ka jingthaw bad jingpyn khlain ia ka jingiatylli hapdeng ki nonghikai SSA.
