Shillong, Rymphang 11: Ban kyntiew ia ki jingtei ban pynbiang ia ki Iingbasa ia kiba wan kai sha Jylla, ka sorkar jylla hynne ka sngi Balang kala aiti ia ka jaka sha ka InterContinental Hotels Group (IHG) ba kan tei ia ka Holiday Inn Resort ha Tura, kaba kot T.130 Klur.
Ia kane ka jingialang aiti jaka, la pynlong da ka Tnad Tourism ha Hotel Polo Orchid, ha ka jingiadonlang u Myntri Rangbah ka jylla u Conrad K. Sangma, u Myntri kam jngohkai u Timothy D. Shira, u Myntri ka Tnad PHE bad Housing u Marcuise N. Marak, ki heh ophisar sorkar bad ki nongmihkhmat jongka IHG.
Haba khein ia kane ka jingaiti jaka kum ka sngi kaban sah nam ha ka histori, u Myntri Rangbah ula ong, ba ka rai ban thaw ia ka 5-Star Hotel ha Tura ka pyni ia ka jingiohi jngai jong ka jylla ha ka ioh ka kot.
“Nga tharai ba bun napdeng jong ngi, kim lah ban poi pyrkhat ba ka Tura kan don ia ka 5-Star Hotel,” ong u Sangma bad bynrap ba ka sorkar kala shimkhia ban wanrah ia ka 5-Star Hotel ha ka jaka jong ka 4-Star. “Watla ka lah ban don ia ka jingiapher ha ka 1 Star, ka jingiapher hapdeng ka 4-Star bad ka 5-Star Hotel ka long kaba kongsan”.
Kane ka project, ka dei kaba la mang ban pynlut kumba T.130 Klur, bad ka dei kaba la buh kum shi bynta jong ka Mission 10 ka Jylla, kaba la sdang ha u snem 2019, ban pynlong ia ka jylla kaban kynjoh ia ka ioh ka kot kaba $10 Billion. U Sangma ula ong ba ioh ka kot ka jylla kala kiew na ka $4 billion ha u snem 2018–19 mynta sha ka $7 billion, da kaba buh ia ka thong ban kynjoh sha ka $10 billion ha ki snem kiban dang wan.
Ula pynshai ruh ia ka jingkiew sted ha kaba iadei bad ka jingpynlut jong ka jylla na ka T. 6,811 Klur ha u 2014 sha ka T.23,475 Klur ha u 2025 bad ka jingkiew ka Capital Investment na ka T.1,259 Klur sha ka T.6,395 Klur ha katei kajuh ka por. Katkum ka jingong ka jongu, ka jingshim ram ne Borrowings kala neh hapoh jong ka jingbuh ia u pud, kaba la kyrshan da ka jingiohlum khajna kaba heh jong ka jylla bad ka jingkiew ka khajna na ka sorkar pdeng.
U Myntri Rangbah ula banjur ba ka jingpyntrei ia ki jingtei bapher bapher ka dei ban long ha baroh ki liang.
“Ngi donkam ia ki surok. Ngi donkam ia ki hospital. Ngi donkam ia ki skul. Ngi donkam ia ka umbam umdih bad hooid ngi donkam ia ki Hotel,” ula ong haba pynphai nia kylla ia kiba kynthoh ban tei ia kane ka hotel kaba remdor.
U Sangma ula pynbna ruh ban tei ia ka “Homestay-cum-Games Village” na ka bynta ka National Games 2027, hapoh jong kane ka scheme, ki nongioh jingmyntoi kin iohpdiang 70% ka Subsidy ban tei ia ki Homestay kiba la pynwandur kum ki Sports Hostel ,kiba lah ban pyndep ia ki kyndon jong ka Games Guidelines. Hadien ba la dep katei ka jingiakob ialehkai, kitei ki jingtei kin iai don bad ki nongioh jingmyntoi ba kin pyniaid iew ia ki.
Kiwei pat kiba la ai jingkren ki kynthup ia u Myntri ki kam Jngohkai Timothy D Shira, u nongmihkhmat ka IHG Gautam Tyagi, u Deputy Commissioner ka West Garo Hills bad kiwei kiwei.
