Shillong, Rymphang 11 : Ki Pulit ka Jylla kila kem sa arngut ki briew, kynthup u trai ka par dewiong lem bad u nongpyntrei ia ka par, haba iadei bad ka jingbthei ka par dewiong dang shen ha Mynsngat-Thangsko, East Jaintia Hills, kaba shim iaka mynsiem ki 31 ngut ki nongbylla.
Kine kiba shah kem ki dei kiba la ithuh kum u Process Dkhar na Sutnga bad u Tensing Suchiang ba na ka shnong Umlawang.
“Ngi la kem sa arngut ki briew. Uwei u dei u trai ka par dewiong bad uwei u dei uba pyniaid ia kane ka par tih dewiong beain” ong u Superintendent of Police Vikash Kumar.
Hashuwa kane, ki Pulit kila kem ia arngut ki trai par, u Forme Chyrmang (36) na ka Shnong Jalaphet Pordung bad u Shamehi War (42) na Sutnga Pohwaiolong, kiba la shah thep hapoh ka judicial custody ba 14 sngi.
Ki Pulit kila tohkit ia ka jingdon kiwei pat ki briew kiba donkti ha ka kam tih dewiong beain, kynthup ki nongbei pisa bad ki nongshalan ia u dewiong na kane ka jaka.
Ka National Green Tribunal (NGT) kala khang pyrshah ia ka jingtih dewiong thliew khnai ha Meghalaya naduh u snem 2014namar ka jingjot ka mariang bad ka jingsngain ki nongtih par.
