Shillong, Rymphang 09 : Ka Iingkashari Meghalaya High Court kala khot hajir ia u Deputy Commissioner (DC) bad u Superintendent of Police (SP) ba kin wan mih dalade ha Iingkashari, kaba la shim suo motu case halor ka jingbthei ka par tih dewiong beain ha Mynsngat-Thangsko, East Jaintia Hills, kaba la shim ia ka mynsiem ki 27 ngut ki nongbylla tih dewiong.
Haba kren bad ki lad pathai khubor, u Superintendent of Police Vikash Kumar ula iathuh ba ka Iingkashari High Court kala shim mukotduma ia kane ka jingjia bad kala jia halor ia u DC bad SP jong ka District ba kin wan mih dalade ha Iingkashari.
U Myntri Rangbah ka Jylla Conrad K Sangma ha ka sngi Nyngkong, ula pynbna ia ka rai jong ka Sorkar Jylla ban thung ia ka Judicial Inquiry Commission hapoh ka Commission of Inquiry Act, ban tohkit ia kane ka jingjia.
Arngut ki trai par, u Forme Chyrmang (36) bad u Shamehi War (42), kila shah kem bad shah set ha ka police custody ba lai sngi.
“Haba iadei bad ka jingpynbthei bomb ha ka par dewiong beain ba jia ha ka 5 tarik Rymphang, ka Iingkashari kala shim mukotduma bad khot ia u DC bad SP ka EJH ban wan mih dalade ha Iingkashari. Namar kane ka kam ka dang don hapdeng ka jingbishar ka Iingkashari, ngim lah ban kynthoh eiei palat ia kane ha kane ka khyllipmat” ong u Kumar.
Hynrei ula pyntip ba ka jingtohkit ka dang iaid shaid shaid hapoh ki kyndon jong ka Ain.
“Ka jingtohkit ka dang iaid shaid shaid. Ngi la kem briew bad ka jingtohkit kala iaid ha ka lynti kaba dei. Ngi ngeit skhem ba yn sa wanrah ia ka sha ka jingkut kaba thikna,” u la pynpaw.
Haba iadei bad ka jingiaid ka jingbishar ka Iingkashari, u Kumar ula pyntip ba ia ka sien leit hajir biang kan sa shai hadien ba ka iingkashari kala pynmih ia ka hukum. “Ngi khmih lynti ia ka hukum ban mih mynta ka janmiet. Tang hadien kata ngin sa lah ban pynthikna ia ka sngi ban leit hajir biang” ula bynrap.
Haba kyntait ia ki jingiakren ba ki jingpyrshang ban wad ia ki briew kala iaid suki, u SP ula pynthikna ba ka jingiawad briew ka dang bteng wat hapdeng ki jingeh kiba bun.
“Ka jingwad ia ki briew ka dang iaid shakhmat. Ka jingwad hynnin ka sngi ruh kala iaid, watla ym shym la lap shuh ia ki met. Ka jingiawad kan dang bteng mynta ka sngi” ula ong.
Haba iadei bad ka jingneh ka jingiawad ia ki briew, u SP ula ong ba kane kan shong ha ki jingaiktien na ki agency kiba don bynta kynthup ka National Disaster Response Force (NDRF), State Disaster Response Force (SDRF), bad kiwei ki kynhun ai jingiarap, haba buh hakhmat ia ki jingeh ha ka jinglong ki jaka bad ka jinglong jingman ha katei ka par.
 bad u Superintendent of Police (SP) ba kin wan mih dalade ha Iingkashari, kaba la shim suo motu case halor ka jingbthei ka par tih dewiong beain ha Mynsngat-Thangsko, East Jaintia Hills, kaba la shim ia ka mynsiem ki 27 ngut ki nongbylla tih dewiong.){kind=link}