New Delhi, Nailur 22 : Ki Myntri Rangbah (CM) ka Assam bad Mizoram kila iakynduh lang hapoh Assam House ha Delhi hynnin ka sngi Balang ban iamir jingmut halor ki kam iakajia pud kaba la neh mynta da ki phew snem.
Ha kane ka jingiakynduh, u CM ka Assam u Himanta Biswa Sarma bad u CM Zoramthanga kila iamir jingmut ruh na ka jinglah ban thaw ia ka regional committee na ka bynta ban lah ban weng noh ia kane ka jingiakajia pud hapdeng kine ki ar jylla.
Haba kren halor kane ka jingiakynduh, u Sarma ula ong ba kila don ha ka lynti ban thaw shen ia ka committee kaba thmu ban lah ban pynkut noh ia kine ki kam iakajia pud hapdeng kine ki artylli ki jylla.
Ka Assam bad ka Mizoram kila don hapdeng ka jingiakajia pud mynta la bun phew snem.Ka daw ha lyndet jong kane ka long namar baroh ki ar jylla kila bud iala ki jong ki bynta khappud ba la pyniaphiah hapdeng jong ki.
Katba ka Mizoram kala bud ia ki kyndon kiba iadei bad ka 1875 Bengal Eastern Frontier Regulation (BERF), ka sorkar Assam kala pynksan lyngba ki kyndon ba la pyniaphiah jong ka snem 1933.
Katkum ka BERF, ki thain kiba hap hapoh Mizoram ki don ia shibun bah ki jaka ia kiba la kam trai da ka Assam.Hynrei, ka Assam da kaba bud ia ka kyndon pyniaphiah kaba thymmai kala kyntait ia ka jingkam jaka jong ka Mizoram.
