Shillong, K’lyngkot 29: U Symbud Myntri Rangbah ka Jylla Bah Sniawbhalang Dhar ula pyntip ba un sa lum ia ka jingialang bishar kam bad ka Sports and Youth Affairs Department ha ka Sngi Thohdieng ban iakren halor ki jingpynkhreh ban pynlong ia ka 39th National Games.
Ha kane ka jingialang un wan ban iashimbynta lang u Myntri ka tnad Ialehkai u Bah Wailadmiki Shylla, ha kaba kin pynleit jingmut halor ki mat kiba kongsan kiba iadei bad ki jaka pynieng kali ne Parking Lot bad ka Game Village.
“Ngi ngin sa iakren halor kiba bun ki mat kaban kynthup ruh ia ki jaka pynieng ia ki kali, Game Village ha ka jingialang kaban long lashai ka sngi Thohdieng” ong u Bah Dhar haba iakren bad ki nongthoh khubor hynne ka sngi Palei.
Ula bynrap ba katei ka jingialang kan iarap shibun ha kaban ithuh ia ki jingdonkam na ka bynta ban pynbiang ia ki jingdonkam bad ki jaka set ia ki kali ha Garo Hills, Jaintia Hills bad ha Nongbah Shillong.
Da kaba iaid ryngkat bad ka jingshim rai jong u Myntri Rangbah ka Jylla u Conrad K Sangma, na ka liang u Bah Dhar ruh ula banjur ia ka jingkongsan ban pynneh ia ka jingkhuid jingsuba hashwa ban pynlong ia ka National Games bad ka ong ba yn sa pynlong ia ki prokram ha kylleng ki shnong ki thaw ban pynsngewthuh ia ki paitbah ban kyntiew ha kaban lehkhuid lehsuba.
“Ia katei ka mat ngi lah dep ban iakren ha ka jingialang bad ki heh ophisar jong ka tnad Urban Affairs hynne ka sngi. Ngi lah dep bthah ia ki, ba kidei ban leit sha baroh ki shnong ki thaw ban ai ia ka jingpynsngewthuh ia ki paitbah” bad ka bynrap da kaba ong, “Ngi kwah ia ka jingkhuid jingsuba, ka jingkhuid jong ka nongbah kam dei kaba lah ban leh eiei da marwei hi, hynrei baroh ki lah ban leh da kaba iasnohkti lang”.
Ka Sorkar kala rai ruh ban maramot ia ki lynti iaid kjat bad ia ki jingker kiba la sniew bad ka don ia ka jingthmu ban buh ia ki jingthoh ne Signboards ban kyrpad ia ki paitbah ban pynlong ia ka Sor Shillong kaba khuid.
Ha kaba iadei bad ka jingtei ia ki jaka pynieng kali, u Bah Dhar ula ong ba ki lah dep kyrpad ba ia kine ki jingtei dei ban pyndep noh hapoh jong u snem 2026.
