Nongstoiñ, Nailur 22: U MLA barim bad President ka HSPDP Bah KP Pangniang hynnin ka sngi balang, ula leit ban ujor hakhmat u Superintending Engineer (SE) ka Tnad PWD Western Circle halor ka rukom pyntrei ba khlem ishoh ia ka surok Pradhan Mantri Gramsadak Yojana (PMGSY) na Tynghor sha Athiabari,kaba jngai kumba 16 km eiei.
Kane ka surok PMGSY ka dei kaba la khot tender haduh lai sien lai wat, hynrei ki contractor kim shym la wan shakhmat ban shimti ia ka kam na ka daw ka jingrit palat ka jingmang pisa.
La iathuh ba ia kane ka surok la shimti ban pyntrei da uwei u Contractor uba la pyndep ia ka kam kumba lai kilometre eiei, hynrei ha kane ka por lyiur ba dang shu dep, kane ka surok kala pra bad jot rathai noh namar ka jingsieng rong ka dei kaba la leh da ka rukom shna kaba thymmai kaba la shu khleh ia ka khyndew bad ka kynja dawai bala tip kum ka ANT khlem da pyndonkam mawria.
Namar kane ka jingjot noh ka surok, u Bah KP Pangniang ha ryngkat u Sirdar ka Hima Jyrngam Bah Nasar Syiem Jahnoh lem bad katto katne ki rangbah shnong, kila leit iakynduh ia u Superintending Engineer ka PWD Western Circle, bad kyntu ba un thaw lad ha ka ban pynkylla noh ia ka rukom pyntrei ia katei ka surok.
Kat kum ka jingong jong ki, kila dawa ba ia kane ka surok dei ban siang noh da u mawria kumba leh ia kiwei kiwei ki surok.
Kine ki Nongialam kila aiti ruh da ka jingthoh kaba la iasoi lang sha une u Heh ka Tnad PWD ryngkat ka jingkyrpad ban pyntip sha ka Sorkar Jylla ba kan leh ia kaba donkam.
U Bah Pangniang u iathuh ba kane ka surok ka dei kaba sdang naduh ka shnong Nongkhlain bad ka pyniasoh bad ka surok Riangdo-Athiabari. Ka dei ruh ka surok kaba ki paidbah ka thain ki donkam haduh katta katta ban leit sha ka Iew Hahim kaba pyniaid ia ki marrep kum u sying, u kwai, ka kait, ki soh, ki jhur bad kiwei kiwei.
U Bah Pangniang ula ong ba ki paidbah ka thain kila pynsngew ia ka jingdonkam ban pyntrei sted noh ia kane ka surok bad ban pyndep hapoh une u snem ba mynta khang ba kan pynsuk ia ka leit ka wan jong ki.
