Shillong, K’lyngkot 28 : Ka Drug Reduction, Elimination & Action Mission (DREAM) jong ka Sorkar Jylla ha ka sngi Balang, kala pynlong ia ka jingialang iasyllok bad ki kynhun Seng Kynthei na ki shnong bapher bapher ka Shillong ban nang pynkhlain ia ka jingiashimbynta ha ka jingiakhun pyrshah ia u droks ha ki shnong ki thaw.
Palat 50 ngut ki nongialam seng kynthei kila iashimbynta ha kane ka jingialang, bad pynsngew ia ki jingeh kiba mih bad ka jingdonkam ban pynsngewthuh paidbah bad ban leh eiei ryngkat lang.
Ka jingiashimbynta shitrhem jong ki ka pyni ia ka jingaiti lang kaba khlain ha kaban iakhun pyrshah ia une u jingdih pynbuaid bad ban pynkhlain ia ki lad jingiada ha ki shnong ki thaw nalor ki jingpyrshang ban ai jingsumar ia ki nongdih ba kin lait noh na ka jingmlien kaba sniew.
Ka jingialang kala pynleit jingmut ruh halor ka jingpynkhlain ki buit treikam ha ki shnong ki thaw bad ban pynkhlain shuh shuh ia ka bynta jong ki Kynthei ha kaban iada iala ka longiing longsem bad ki marjan marpa na ka jingma jong u droks.
Ki Nongmihkhmat na ki Seng Kynthei bapher bapher kila pynsngew ia ki jingshem jong ki hala ki jong ki jong ki shnong, haba pynpaw ia ki jingeh kiba iai mih man ka sngi, ki kynhun kiba don ha ka jingma bad ka jingdonkam kyrkieh ban pynsngewthuh iaki paidbah, ka jingai jingsumar ba dang kloi, ka jingiasyllok bad ban ialeh eiei ryngkat lang.
U Mission Director ka DREAM Bah Francis Kharshiing ula batai sha ki nongiashimbynta halor ka thong jong ka Mission, ki kam kiba lah iaid, bad ki jingkyrshan kiba don, kynthup ka jingai jingshakri ha ka jingiasyllok, ka jingpynioh ia ki lad ai jingsumar, ki lad ai jinghikai ban treikam na ka bynta ki nongdih droks kiba la ioh pat ia ka jingkoit.
“Ka DREAM Mission ka ithuh ia ka synniang ka bym lah pynshongdor jong ki Seng Kynthei ha ka imlang sahlang, ka jingiasyllok ia ki longiing longsem bad ka jingiakren bad ki samla” ong u Bah Kharshiing.
“Ki Nongialam Seng Kynthei ki don ia ka bynta kaba kongsan bha ha kaban ithuh dang kloi ia ka jingdih droks bad ban syllok ia ka jingim kaba koit ba khiah” ula bynrap.
Ia ka jingialang la pynkut da ka rai ban iatreilang ha kaban wanrah ia ka imlang sahlang kaba lait na u droks bad ban pynthikna ia ka lawei kaba shngain, kaba koit ba khiah ia ki samla ka Jylla.
 jong ka Sorkar Jylla ha ka sngi Balang, kala pynlong ia ka jingialang iasyllok bad ki kynhun Seng Kynthei na ki shnong bapher bapher ka Shillong ban nang pynkhlain ia ka jingiashimbynta ha ka jingiakhun pyrshah ia u droks ha ki shnong ki thaw.){kind=link}