Shillong, K’lyngkot 28 : Ka Bharatiya Janata Party (BJP)-Meghalaya, kala pynrem jur ia ka jingtah poster ba byrngem ia ki paid Garo ha West Garo Hills, ha ka kyrteng ka ISIS-K, bad dawa ia ka Sorkar Jylla ban thwet mardor ia ki briew ba donkti.
“Ka BJP ka dawa ia ka Sorkar Jylla ban leh eiei mardor bad kylli ia baroh ki nongshongshnong ka Jylla ba kin peit pyrman bad ban nym ailad ia ki jingthmu sniew jong ki riew bymman na shilliang khappud” ong u General Secretary ka BJP Bah Wankitbok Pohshna ha ka sngi Balang.
Ka party kala kyntu ruh ia ka Sorkar Jylla ba kan shimkhia ia kane ka jingjia bad pynthikna ba ki bor pahara ka ri ki lah ban tem ia kum kine ki jingma.
“Ka State Unit ka BJP ka kyntu ruh ia ka Sorkar Pdeng ban shimkhia bad kwah ba kan pynthikna ia baroh ki nongshongshnong ka Meghalaya ba ki bor pahara ka ri ki dei kiba lah ban pynduh pyndam ia kino kino ki kam bymman jong kine ki kynhun” ong u Bah Pohshna.
“Ka jingkiew ki kam Jihadi kila dei ki jingsngewkhia bala slem bha bad kane ka jingeh kala nang kynton da ka jingdon ki khwan myntoi, kiba la iarap ia ki mynderi rih ba kin rung suk sha ka jaka jong ngi na ka bynta ka jingmyntoi politics, ka Congress ka dei kaba pynwandur ia kum kane ka kam mynta la palat 50 snem” ula bynrap.
-Meghalaya, kala pynrem jur ia ka jingtah poster ba byrngem ia ki paid Garo ha West Garo Hills, ha ka kyrteng ka ISIS-K, bad dawa ia ka Sorkar Jylla ban thwet mardor ia ki briew ba donkti.){kind=link}