Aizawl, K’Lymhkot 28: Ka sorkar Mizoram ka la rai ban sdang noh ia ka sngi kren ha ka ktien Hindi manla u bnai ha baroh ki skul ban pynlah bha ia ki khynnah ba kin nang ia kane ka ktien.
Haba kren sha ki lad pathai khubor, u Myntri ka tnad pule skul u Vanlalthansai u la ong ba ia kane ka jingthmu yn pyntreikam shisien shi bnai hapoh ka jingpeit jong ka tnad pule skul jong ka jylla. Ha ka sngi ba la buh, yn pynshlur ia ki khynnah skul bad ki nonghikai ban iakren da ka ktien Hindi.
U la ong ba kane ka sienjam ka long nyngkong eh ban pynbha ia ka ktien Hindi ban kren hapdeng ki samla pule, khamtam kito kiba na ki jaka nongkyndong.
U myntri u la kdew ba bun ki samla pule Mizo ki ïakynduh ïa ki jingeh ha ka ktien haba ki leit shabar jong ka jylla na ka bynta ka jingpule kiba kham shalor ne ban ïoh kam, ha kaba ka jingnang ïa ka ktien Hindi ka long kaba donkam. Ban weng ia kane ka jingeh,yn ai jinghikai ia ki nonghikai Hindi ban iarap ia ki khynnah skul ban nang ban kren bha, katba yn ai jingkyrshan kyrpang ia ki khynnah skul ki bym sngewsuk ban kren ia kane ka ktien.
U Vanlalthansai u la bynrap ba ka sorkar kan sa pynbna paidbah ia ka sngi kren Hindi na ka bynta baroh ki skul.Ia ka syllabus na ka bynta ka ktien Hindi ba la kren yn pynkhreh da ka State Council of Educational Research and Training (SCERT).
Ka Mizoram, ka jylla kaba la synshar da ki jaitbynriew riewlum Mizo, ka duna bha ka jingtip ia ka ktien Hindi namar ka jingduna jong ki briew kiba kren Hindi.Ka ktien Mizo bad ka ktien Phareng ki dang long ki (ktien sorkar) ne official languages jong ka jylla.
