Shillong, K’lyngkot 28 : U Myntri Sorkar Marcuise N Marak ula pynrem jur halor ka poster ba byrngem ia ki paid Garo ba kin mih noh na ki jaka jong ki, kaba la thoh ha ka kyrteng jong ka ISIS-K.
Ula pyntip ba ki bor pyniaid District ka West Garo Hills kila ioh ia ka jingtip halor kane bad kila leh mynta ia ki kam ba dei ban leh pyrshah ia ki briew kiba donkti.
“Kum u nongmihkhmat ka Jylla, hynrei nyngkong, kum u nongshongshnong, bad kum u dkhot ka Jaidbynriew Garo, nga pynrem jur ia kane ka kam pyntieng pynsmiej bad jingbyrngem pyrshah ia ki jaka jong ngi, ia ki briew jong ngi bad ia ka jingiashong suk shongsain lang” ong u Marak.
Ula ban jur ba ka Meghalaya ka ieng na ka bynta ka jingiatylli, ka jingiaburom markylliang bad ka jingialong kawei jong baroh ki Jaidbynriew.
“Kum kine ki jingpyrshang ban pynsaphriang ia ka jingtieng jingsmiej bad ka jingpyniapait iapra kam don jaka satia ha ka imlang sahlang jong ngi” ong u Marak haba bynrap “Ka Meghalaya ka ju ieng beit ha ka jingiatylli, ka jingiaburom markylliang bad ka jingialong kawei jong baroh ki Jaidbynriew, kam pher ia ka jingiapher niam ne jaidbynriew”.
“Ki bor District kila pynkhlain bha ia ka jingpeitngor bad jingtohkit ban lah pynithuh bad leh eiei pyrshah ia ki briew kiba donkti ha kane ka kam be-ain” ula bynrap.
