Shillong, K’lyngkot 25 : Ki thei ialehkai ka Lumparing Sports Club, ki la ioh ban rah ia ka nam lahduh ka Shillong Sports Association Women’s Football League 2025 da ka jingpynliem ia ka Laitkor SC da 3-1, ha ka phainal kaba la long hynnin ka sngi saitjain ha SSA Stadium, First Ground, Polo.
Ia ki lai tylli ki kol ka Lumparing SC la thep ia ki da Pynhun Shulet (18′, 25′, 60′) kaba la biang pura ban pynlong ia ka Lumparing SC ba kan rah ia ka nam lahduh ha ka sien kaba nyngkong bad ia ka shi kol ka Laitkor SC la thep ia da ka Tracy Rympei (22′).
Ka jingiakhun ha ka kylla step hi ka long ba ki ar kynhun ki la jam sha ka jingiashongthait hadien ba ka Lumparing ka la lah shwa ba kan tam da 2-1.
Hynrei haba la wan ban bteng pat ia ka kylla miet, ka Lumparing SC ka la iai bteng ba kan nion borbah bha ia ka kynhun ialehkai ka Laitkor, kaba na ka por sha ka por, ki thei ialehkai dien ki jong ka, ki la hap shisha ban shan tyngeh iala ka jong ka kut.
Hadien kane, ka Pynhun ka la ioh ia ka kabu ba kan rah kham sted shakhmat ia ka bol bad ha kut jong ka kol, la fopul noh ia ka kaba pynlong ia ka Lumparing ban ioh ia ka kabu ban shut ia ka penalty, kaba hangne ka Pynhun joit ka la ieng na madan ban shut ia ka penalty, hynrei ha ka jingkyrkieh ka bol suit ka la her shalor jong ka dieng kol.
Pynban ym slem hadien jong kane, ba ka Pynhun ka iai long ka thei ialehkai kaba kynsai bha ha kane ka lympung bad ban bynrap ban thep pat ia ka kol kaba lai.
Kumta ha kaba kut ka Lumparing SC ka la ioh ba kan lehkmen ban rah ia ka nam kum ka lahduh ryngkat ka song pisa kaba long 50 hajar tyngka katba ka Laitkor kan ioh ia ka song pisa kaba long 25 hajar tyngka.
Ki khusnam shimet b a la sam ha kaba kut kane ka lympung ialehkai ki long Top Scorer ka leit sha ka Catherine Kharkongor hadien ba ka la ioh ba kan thep 7 kol, Best Defender Badarisha Kharumnuid. Ka PFR, Best Midfielder Bahunlang Synrem ka Lumparing SC, Player of the Final Match Pynhun Shulet. ka Lumparing SC, Best Discipline Team Rangdajied United FC.Best Promising Player PFR FA- Phibanda Mary Nongrum., Best Player of the Tournament, Lumparing SC- Catherine Kharkongor, Best Goalkeeper Priyanka Latang ka Lumparing SC.
