Dawa ki Sengbhalang ka Ri-lum Garo ia ki kyndon ba khlain ban tehlakam ia ki kam beain

Shillong Kyllalyngkot 23: Ki kynhun sengbhalang na rilum Garo hynne ka sngi Thohdieng, kila phah ia ki jingai jingmut sha u Myntri Rangbah ka Jylla u Conrad K Sangma ba kyntu ia ka sorkar ban shimkhia ia ki daw kiba lam sha ka jingshah pyniap u dkhot jong ka ACHIK u (L) Dilseng M Sangma ha ka 9 tarik u Kyllalyngkot.

Kine ki kynhun kiba kynthup ia ka ADE, APEX Committee, AYWO bad FAF, kila pynpaw ia ka jingsngewkhia halor ka jingmih ki jingiakynad hapdeng ki paid riewlum bad ki bym dei ki riewlum, da kaba kdew ba kadei namar na ka jingbym biang ka jingai jingshakri ka sorkar, ka jingbym lah ban tehlakam ia ka jingwan rung be-ain ki briew kiba nabar bad ka jingpulom ha kaban tehlakam ia ki kam be-ain kum ka jingtih maw bad ka jingkhaii tuh ia ki dieng.

“Kano kano ka jingwan kyntur pud be-ain ia ki jaka jong ngi, kadei kaba la shim ba kadei kaba buh ha ka jingma kaba khraw ia ka jaidbynriew ka jong ngi” la pynpaw ha ka shithi bad ka kdew ia ka jingdonkam ban don ka jingiatreilang hapdeng ki tnad sorkar bad ki bor khmih ia ka ain.

Kine ki sengbhalang kila ai jingmut ruh ia ka jingdonkam ban wanrah ia ka bynta ban don ka jingiatreilang hapdeng ki tnad sorkar ban tehlakam ia ki kam be-ain bad ka ong, “Kine kidei ki mat, kaba ngi sngew ba dei ban don ia ka atiar ha kaba iadei bad ka jingiatreilang hapdeng ka tnad Land and Revenue, Home Department, District Council Affairs Department, Forest and Environment Department, Autonomous District Councils, bor pyniaid District bad ki pulit jong ka District ba kin shimkhia mardor bad leh thikna ha ka por kaba la buh ban bat ia ka ain kaban lam ruh ha kaban iarap ban pynneh ia ka shongsuk bad kan iarap ruh ban kyntiew ia ka jingburom mar kylliang hapdeng ki paid riewlum bad ki bym dei ki riewlum”.

Kila kyntu ia ka sorkar ban buh ia ka Meghalaya Police Battalion Camp ha ki jaka kiba kongsan ha ki ri thor.

“Ngi lah ia sakhi ia ki jingjia ha ki ri thor jong ka rilum Garo ka long kaba shongsyier bha mynta bad uno uno u briew ruh u lah ban sngewthuh ba kano kano ka jingphalang i ding barit eh, ka lah ban pynkem ding ia ka synduk kaba dap da ki jingpynbthei. Ngi sngewthuh ruh ba kane ka jingjia kadei ruh da ka jingsngew kaba la dap da ka jingkun kaba la shu set baroh shi katta kaba lah ban bthei ha knao kano ka por bad shisien ba katei kala jia, kan long kaba eh bha ban tem ia ka jingjia khlem da don bun bah ki pulit ha ka thain bad kumta ka jingai jingmut ka jong ngi, ka long ba dei ban shna ia ka MLP Battalion Camp bad ban pyntreikam noh ha ki jaka kiba kongsan, kaba don ia ki paid na kitei ki ar tylli ki jaidbynriew ia kaba ka jingiadei ka jingki ka long kaba ym lah ban batai lypa ia ka jinglong jingman”.

Ki sengbhalang kila dawa ruh na ka sorkar ba kan ai T.10 Lak ia ki bahaiing bahasem kiba la duh noh ia la u baieid bathoin ryngkat bad ka thung ia ka Special Investigation Team ban tohkit bniah halor ka jingshah pyniap u (L) Dilseng M. Sangma.

“Kadei ka jingthmu ka jong ngi ban kyrpad ia ka sorkar Meghalaya ban thung ia ka Special Investigation Team ban tohkit ia ka jingshah pyniap u Dilseng M. Sangma namar ba kane ka jingjia kadei kaba la sngewkhia da baroh bad kumta dei ban don da ka kynhun ki pulit ophisar kiba kyrpang ban tohkit ia katei ka kam. Kan long ruh kum ka dak ban wanrah biang ia ka jingshaniah. Hynrei ngi lah ioh ia ka jingpynsngewthuh ba la dep ban thung ia ka SIT, kumta ngi kwah ban pynpaw ia ka jingsngewnguh ia ka Sorkar Meghalaya bad ia ki bor kiba dei khmih na ka bynta kane ka sienjam kaba bha” la pynpaw ha ka shithi.