Shillong, K’Lyngkot 23: Ka bor District West Garo Hills ha ka sngi Thohdieng, kala pynjari da kyndon aiñ ha ki 33 tylli ki shnong kiba hap hapoh ka Hallidayganj, Rajabala, Phulbari bad Tura Police Station ban tehlakam ïa kino kino ki jingkynad pher jaidbynriew bad ban pynneh ïa ka jingshongsuk shongsaiñ ha katei ka thaiñ, hadien ka jingshah thombor ki sengbhalang ha Goalgoan.
Ka hukum kat kum ka kyndon 163 jong ka Bharatiya Nagarik Suraksha Sanhita (BNSS) bala pynmih da u district magistrate u Vibhor Aggarwal, ka khang pyrshah ia ki jingiaid paidbah khlem jingbit ne jingialang ba 5 ngut ne palat ha ryngkat ka jingrah ia ki tiar pynkynmaw kiba lah ban pyndonkam kum ki tiar thombor kynthup ki dieng, ki maw naduh 6 baje janmiet haduh 6 baje mynstep.
Ka hukum ka la maham ba kano kano ka jingpynkheiñ kan khring ïa ki jingpynshitom katkum ka kyndon 223 jong ka BNS bad kiwei kiwei ki kyndon ain.
Ki 33 tylli ki shnong kiba la ithuh kum ki jaka ba don jingma ki kynthup, Hallidayganj, Jeldupara, Shyamding, Kasharipara, Boldamgre, Chibinang, Charkasaripara, Guaragre, Kokaimari, Lalmati, Nawalgre, Batabari, Konarchar, Gansenggre, Mengkakgre, Masangpani, Chandigre, Kharigaon, Sobribari, Gudikangremajraki, Katmil, Tetultulia, Demdema, Old Bhaitbari, Borojhora, Belbari, Rajpur, Jewali, Babilgre, Babulgre, Bollonggre, Songjalgre, Bamundanga bad Chokchokia.
Ka hukum ka la pynpaw ba ka jingjia kaba dang shen ka la pynmih ïa ka jingtieng kaba lah ban mih ka jingïakynad hapdeng ki jaidbynriew kaba lah ban pynthut ïa ka jingsuk jingsaiñ hapdeng ki kynhun jaidbynriew bapher bapher ha ka district.
