Guwahati, K’Lyngkot 18: U Myntri Rangbah ka Jylla Assam Himanta Biswa Sarma ula kynthoh tyngeh khlem da pynpaw kyrteng ïano ïano, da kaba ong ba “ym dei ban don ki nong Assam ki ban pyndem hakhmat u Agent jong ka Pakistan.
U Himanta u la kren ia kane ha ka jingïalang plie mawnongrim jong ka project Kaziranga Elevated Corridor ha ka jingiadon lang u Myntri Rangbahduh ka ri u Narendra Modi.
U Himanta u la ong ba ka Jylla Assam bad ki nong shong shnong kin ym pyndem ha ki riew nongwei bad u la pynskhem ba ka Jylla ka la pyllait ïa ka Batadrava Than na ki nongwan rung tuh bad u la ban jur ban ïada ïa ka jinglong kyrpang bad ka jinglong trai jong ka Jylla Assam.
Haba kynthoh ia u MP ka Congress u Gaurav Gogoi uba pyrshah ia ka projek Kaziranga Elevated Corridor, u Myntri Rangbah u la ong, “Lada phi kwah ban pyrshah, iaid shakhmat ban pyrshah hynrei ka Assam ka don ia ka jingangnud bad iaka thong bad kan leh ha ka ban pynurlong.
Kane ka jingkynthoh ka long shi bynta jong ka thma ktien kaba nang jur hapdeng ka BJP bad ka Congress ha shwa ka elekshon MLA 2026.
Dangshen u Myntri Rangbah u la kynnoh ïa u Gaurav Gogoi u president jong ka Assam Congress bad ka kurim jong u na Britain ka Elizabeth Colburn ba ki don ka jingïadei bad ka tnat syntiat jong ka Pakistan, ka ISI, bad u la bthah ïa ka kynhun Special Investigation Team (SIT) ban tohkit halor kane ka kam.
Ka SIT ka la ai ia ka kaiphod sha u myntri rangbah ka jylla ha ka 10 tarik Nailur 2025 bad u Myntri Rangbah ka Jylla u la kam ba ka jingtohkit ka la lap ïa ki sakhi kiba phylla kiba kdew sha ka jingthmu kaba kham heh kaba thmu ban pynkhihwin ïa ka synshar khaddar bad u la ong ba shen yn sa aiti ïa ka mukotduma sha kawei ka Sorkar Pdeng.
Naka liang u Gaurav Gogoi u la kyntait ia ki jingkynnoh, da kaba ong ba ka kaiphod ka long kum ka phlim ‘C-grade’ bad pynskhem ba ki paidbah ka Assam ki lah ban iohi lyngba kaei kaba u batai kum ki jingkynnoh ba don jingthmu ha ka sain pyrthei.
