Nongstoiñ, Nailur 20: Ka Northeast Institute of Professional Studies Nongstoiñ, ha ka sngi saitjain bala lah, kala sam ïa ki completion certificate, ki SHR registration certificate bad lah pyniphuh iphieng ia kane ka sngi da ka jingiapyni nam ïa ki riam kiba la suh hi da ki khynnah kiba ladep shah hikai bad pyntbit na kane ka institution.
Ha kane ka jingïalang, la don ryngkat u Shivansh Awasthi, IAS, Joint Secretary ka Sorkar Meghalaya, Executive Director ka MSSDS, u la long kum u kongsan bad ka Memorial Khongkai, SDO, MSSDS kum ka Symbud Kongsan bad u Michael Thongni, Chief Executive Director, NeIPS.
Kane ka project ka dei kawei na ka mission jong ka sorkar kaba la tip kyrteng kum ka Skills Meghalaya, ïa kaba la bei pisa da ka MSSDS ban pyntbit ïa ki khun samla kiba don hapdeng ka jingpyrshang ban thaw ïa ki lad kamai kajih lyngba ka sap. Ha kane ka sngi la ïoh ïa ka jingpyni nam ki samla ïa ki riam kiba ki la suh, ki jingrwai, jingshad ryngkat ki jingput jingtem.
U Kongsan ha kane ka jingïalang u la ai ka jingïaroh ïa u Michael Thongni u ba long ruh u khlieh duh jong kane ka skhlem ai jinghikai kaba la don ha kylleng ka jylla, ba u long u briew u ba ïohi jngai na ka bynta ki khun samla, ha kaba na ka lïang jong u bad kiwei ki heh sorkar kim shym la kyntait ban ïatreilang, haba u wan ban ïakynduh ryngkat ki jingtyrwa bapher bapher.
“Dang shen ka sorkar ha u bnai Rymphang ka la pyrkhat ban pyntrei ïa kane ka scheme kaba dang long thymmai ha ka jylla. Hooid, ki don kiwei ki sheme ruh jong ka sorkar kum ka PMKVY, DDUGKY, hynrei kane ka mission ka kham long kyrpang namar na ka liang u Myntri Rangbah ka jylla u la bthah shai ba ngim dei ban shu kut tang ha ka jingai training bad ym don jingmyntoi ei ei” ong u Awasthi.
“Ka thong kaba hakhmat eh jong kane ka scheme, ka long ban ïarap ïa ki samla ba kin lah ban seng kam hi, ha ryngkat ka jingïalam lynti jong ki jaka ai jinghikai. Kaba sngew tynnad eh ka long ba ki samla kim donkam ban mih shabar ka district, hynrei ki lah ban ïoh ïa ki jinghikai ha ki jaka kaba ki sah” ula bynrap.
U Michael Thongni ha ka jingkren jong u, u la ïaroh ïa une u heh ophisar ba u long u briew u ba jemnud bad long u ba la kloi ban ïarap na bynta ka jingbha ki samla ka Meghalaya.
U la ai khublei kyllum ïa ka sorkar khamtam ïa u Myntri Rangbah uba la wanrah ïa kane ka scheme ka ba ai jingmyntoi shikatdei eh ïa ki khun samla namar ka jingsngewthuh ba ki samla ki long ki rishot ka lashai jong ka Jylla bad ka Ri baroh kawei.
