Shillong, Nailur 20: Ka Environment Coordination Committee (ECC) Elaka Sutnga, kala dawa ia ka Sorkar Jylla ban shna noh ia ka ‘Action Plan’ ban pyntreikam ha kaban tehlakam ia ki ki karkhana Coke kiba kynnoh treikam be-ain ha ka thain.
Ka ECC kala ai ruh da ka dorkhas ha u Myntri Rangbah ka Jylla Conrad Kongkal Sangma kaba pyntip ruh ba ka Committee kala rai ban shna noh hi lakajong ia ka Action Plan ba 9 tylli ki mat bad ai jingmut ia ka Sorkar Jylla ba kan pyntreikam ia ka.
Haba iakren bad ki nongthoh khubor hynne ka sngi ba-ar, u Legal Adviser ka ECC Bah Reading War ula ong ba ka National Green Tribunal (NGT) kala bthah ia ka Sorkar Jylla ban thaw ia ka ‘Action Plan’ n aka bynta kito ki karkhana coke kiba la ioh ia ka Consent To Operate (CTO) hashuwa u snem 2020.
“Ka ECC ka kwah ban ai jingmut ba lada la thaw ia ka Action Pan lane ba dang mut thaw hashuwa ba kut ka jingbuh por bala ai, ka Sorkar Meghalaya lane kino kino ki Tnad ba dei khmih ki dei ban mynjur ha kaban pyntreikam ia ki mat ba kongsan jong kane ka Action Plan bala pynkhreh da ka ECC” ong u Bah War.
Kine ki mat ba kongsan jong ka Action Plan ki long :
-Kane ka Action Plan bad ka jingtreikam jong ka, ka dei ban iaid hapoh ka saw bnai kaba long hashuwa u Naiwieng 2022.
-Baroh ki karkhana coke ba pynkhein ain bala seng hashuwa u Nohprah 2020 bad la ioh ia ka CTO hynrei kim lah pat ban pynbiang ia kiwei kiwei ki jingdonkam bala buh, la dei ban khang noh hashuwa u Naiwieng, 2022.
– Lada ka jingpynkynriah ia kine ki karkhana coke kan dei shibynta jong ka Action Plan, ym dei satia ban ai jingbit ia kino kino ki karkhana coke ba kin treikam hapoh ka Elaka Sutnga lane ha East Jaintia Hills District.
-Ka Sorkar kam dei ban pynbna ia kino kino ki jaka ne ka thain kum ka Industrial Area lane Commercial Area hapoh ka Elaka Sutnga lada ka long kumno kumno ruh.
– Ym dei ban ai jingmut ia ki karkhana coke ba kin treikam kum ki cluster bad ba ym dei ruh ban pynkylla ia ki stand alone unit kum ki cluster.
– Ym dei ban ai jingbit ia ki karkhana coke ba kin treikam hapoh ka Elaka Sutnga lashai hadien habud.
– Hadien bala kut ka por bala buh, dei ban hukum ia baroh ki karkhana coke ba pynkhein ain ba kin pynpra noh ia ki jingtei bad ban pynwandur biang ia ka jaka bad ka sawdong sawkun kumba ka long baroh shikatta.
– Ka Environment Compensation ( jingsiew bai pynjulor mariang) bala pynjari ia ki 31 tylli ki karkhana coke ba pynkhein ain, kaba la khein lang haduh T. 5.5 klur, dei ban shim rai noh hashuwa u bnai Naiwieng.
– Ia kane ka song pisa bai pynjulor mariang dei ban ai sha ki Shnong kiba shah ktah na ka jingwan kine ki karkhana coke ba kin lah pynkhie im biang ia ka mei mariang bad ka rukom im jong ki Nongshongshnong ha kine ki shnong.
U Bah War ula kdew ruh ba namar ka jingdon kine ki karkhana coke, arngut ki briew kila iap haduh mynta. Ula bynrap ba ka tdem bala pynmih da kine ki karkhana coke kala lam sha ka jingbym lah ring mynsiem bad jingiap jong iwei I riew tynmen bad iwei i Khunlung.
