Plie pyrda ka phlim “Ha Lyngkha Bneng- The Elysian Field’ ia ka Jaffna Film Festival

Shillong, Jan 3: Ka phlim kaba suhthied bad ka rilum Khasi bad kaba kren da ka ktien Khasi kala rah ia ka nam ka jylla Meghalaya sha ka rynsan ka pyrthei haba ka phlim u Bah Pradip Kurbah “Ha Lyngkha Bneng” – The Elysian Field la pyni paidbah ha Sri Lanka, Jaffna International Cinema Festival, kaba plie pyrda ia ka tamasa kaba 11, ha ka 30 tarik u Nohprah.

Ha ka jingpyni ha Jaffna Thiruvalluvar Cultural Centre, ka phlim kala pyni ia ka jingeh jingjynjar bad ka jingiohi jngai ban iaineh kaba la buh thong ha u snem 2047, ha kaba la im tang 6 ngut ki nongshong shong ha ka jaka kaba don ha kyndong bha. Lyngba ka jingjarjar, jingkynmaw bad ka jingsam lang ia ka jingduh, u Bah Kurbah ula wad bniah ban lap ia ka daw halor ka jingim jong kitei haba ka pyrthei baroh kawei kala jah rngai noh, ka jingmut kaba khlain kaba don jingiadei bad ka imlang sahlang ha Meghalaya bad ka jingiadei kaba iajan bha bad ka jaka bad ka kur ka jait.

Ka Festival kan kut ha ka 4 tarik u Kyllalyngkot.

Ka Jaffna International Film Festival kadei ka rynsan ban wad bad ailad ia ki phlim kiba kham pher ha ka rukom pynsngew ka jongki ha ki cinema. Ka thong hi ka long ban rakhe ia ka cinema kaba laitluid ha ka dewbah, ryngkat bad ka thaw ia ka rukom sngewthuh ia ka kolshor jong kiwei, ban kyntiew ia ka jingiajan bad ka jingiasngewthuh jingmut lyngba ka cinema. Ka festival ka kyntiew bad pynshlur ia ki nongshna phlim kiba dang samla da kaba pyni ha ka sien nyngkong ia ki phlim bad ia ki phlim lyngkot.

Ka phlim “Ha Lyngkha Bneng” – The Elysian Field kala dep ban ioh ia ki khusnam ha ka rynsan ka pyrthei kaba la ai jingithuh ia ka Meghalaya cinema. Ha ka Kolkata International Film Festival, ka phlim kala jop 3 tylli ki khusnam kaba kynthup ia ka Best Film, Best Director ia u Bah Kurbah. Hadien kane kala ioh ia ka NETPAC Award for Best Asian Film ha Moscow International Film Festival ha u snem 2025.

“Nga dap da ka jingsngewnguh ia ka Jaffna bad ia ka Jaffna International Cinema Festival. Ka jingplie ha katei ka miet ha Jaffna Thiruvalluvar Cultural Centre ka long kaba kyrpang da ka jingpyni ia ka phlim ha ka ktien Khasi Ha Lyngkha Bneng – The Elysian Field ha ka 30 tarik u Nohprah 2025.

“Ka long kaba sngewieid ban iohsngew shaphang u Sai Murali uba la pdiang sngewbha ia baroh kiba don bynta ha ki kam shna phlim bad shaphang u Director ka Indian Council for Cultural Relations ha Sri Lanka kaba pyni ia ka jingiadei kaba la neh slem jong ka jingiatreilang hapdeng ka ri India bad ka festival” la ong u Bah Kurbah.

Palat 200 tylli kila rung na ka ri India kaba la kylla long kum kaba heh duh na ki phlim na ki 17 tylli ki ri.

Ha kane ka festival kala don ruh ka jingai burom ia u nongshna phlim ba pawnam u Ritwik Ghatak.