Shillong, Nailur 26: Ka Jaintia Students’ Union (JSU) kala kob markhmat ia ki MLA ka UDP ba dang iasoh shen sha ka BJP ba kin tuklar pyrshah ia ka jingphah plie ia ki Bank ha ka Sngi U Blei, da kaba ong ba kane kan dei ka jingtynjuh la ki trei shisha ne em na ka bynta ki Khristan jong ka Jylla.
Ha ka notice bala phah sha baroh ki Bank ha ka sngi Saitjain, u President ka JSU Jerson Shylla ula ong ba ki Bank kynthup naduh ki Commercial Bank, Cooperative Bank, Regional Rural Bank bad ki shnat PSU khamtam ha East bad West Jaintia Hills, ki dei ban khang khyrdep ha ka sngi u Blei, ka 27 tarik Nailur.
Haba bthah ia ki Bank ba kin kohnguh, ka seng kala buh ia ka jingkyntu ba kyrpang ia ki MLA ka BJP.
“Ka JSU ka pynmih ia ka jingkyntu ia ki MLA ka Meghalaya ba dang iasoh shen sha ka BJP ba kin leh eiei. Lada kine ki nongmihkhmat ki khein kor shisha ia ka jingsngew ki paid Khristan bad kwah hok ban pyni ba ki don hangne ban shakri na ka bynta ki Khristan jong ka Jylla, ki dei ban iakren mardor ia kane ka kam” ong ka JSU ha ka kyrwoh.
Ka JSU kala kyntu ia kine ki MLA ba kin tuklar bad pynthikna ba kaei kaba ki khot ka “nongrim treikam kaba jaboh” jong ka RSS bad BJP kan ym pyniaid donbor ia ki policy ha Meghalaya.
Ka JSU ka ong ba ka Meghalaya ka dei ka Jylla kaba don bun ki Khristan ha kaba ka Sngi U Blei ka dei ka Sngi ba Kyntant ban mane Blei, ban don ryngkat bad ka iing ka sem, bad kano kano ka jingbthah ba hukum ia ki Bank ban treikam ha ka sngi U Blei ka dei ka jingniew bein ia ka jingsngew niam.
Haba maham ia ki Bank lada ki ialeh pyrshah ia ka notice, ka JSU ka ong “Ngi khmih lynti iaka jingia treilang na baroh ki Bank haba iadei bad ka jingkhang khyrdep la sngi U Blei. Ngi kyntu ia baroh ki borkhmih ba kin burom ia ka jingsngew u paidbah”.
