Shillong, Nailur 26: Ka Ayushman Bharat Lumparing Urban Primary Health Centre kaba la tei ha ka jinglut kaba T.4.13 klur la plie paidbah ha ka sngi Saitjain da u myntri ka tnad sorkar uba long ruh u MLA ka South Shillong u Bah Sanbor Shullai.
U Bah Sanbor Shullai u la ïathuh ba kane ka centre, kaba u la batai kum ka mini hospital, ka long kaba lah ban long hadien ba la ithuh ïa ka jaka kaba heh palat 5500 sqft ha ka jingjurip lang bad ka tnat ka Koit ka Khiah bad ka Lumparing Social and Cultural Club ha ka 2 tarik u Lber, 2021.
“Nga ai khublei ïa ka Lumparing Social and Cultural Club.Katkum ki jingbthah jong ka tnat ka Koit ka Khiah ngi la donkam ïa ka jaka bad ngi la ïoh palat 5500 sqft,” u la ong da kaba bynrap ba ïa kane la pynskhem ha ka por ba long u Myntri ka Koit ka Khiah ha katei ka por u James Sangma bad la khot tender mardor.
Haba khot ia kane kum ka jingkyrkhu ia ka thain, u bah Shullai u la ong ba 63 percent ki nongshong shnong ka Lumparing ki dei kiba duk bad kiba sah ha ki jaka iing wai bad ki shem ba ka long kaba rem dor ban leit sha Civil Hospital lane sha Ganesh Das Hospital ban shah sumar bad kha khun.
“Ki dei ki doh ka snam jong ngi hi.Ki surok kiba bha, ka umbam umdih bad mynta kane ka hospital kan long ka jingkyrkhu kaba khraw ia ki,” u la ong.
“Nga wan na ka longïing kaba duk.Ki kmie ki kpa jong nga ki la hikai ïa nga ban ym klet ïa ki tynrai lajong.Ngam dei u Myntri uba leh heh ne uba leh riewkhlaw,” ong u Sanbor Shullai, da kaba pynshong nongrim ïa kane ka projek ha ka jingtreilang bad ka jingkyrkhu U Blei.
U la ai khublei ia u Myntri Rangbah ka jylla u Conrad K Sangma bad kumjuh ruh ia ki ar ngut ki symbud myntri rangbah u Bah Prestone Tynsong bad u Bah Sniawbhalang Dhar bad ia ki ophisar jong ka planning bad Finance kiba la iarap.
U bah Shullai u la bynrap ba ia ka jingtyrwa ban sanction ia ki post na ka bynta katei ka centre la ioh pdiang ha ka 21 tarik u Jylliew bad un sa rah ia ka sha ka sorkar ban ioh ia ka jingmynjur.
