Shillong, Nailur 20 : Ka Jylla kala thaw mynta ia ka High Level Committee ban khmih bad tohkit ia ka jingkynnoh ba ki Nongkhaii kila pynman ia u dewiong bala tih be-ain na Meghalaya kum u dewiong ba mih na Assam.
Ia kane la pyntip na ka bynta ka Coal Controller sha ka Iingkashari Meghalaya High Court ha ka jingshong bishar ia ka PIL bala mudui da uwei u briew ba kyrteng u Champer Sangma, hynne ka sngi ba-ar.
Hynrei, ia kane ka jingbishar la rah biang sha ka 19 tarik Risaw hadien ba u nongmudui ula pan por.
“La aiti na ka bynta ka Coal Controller ba la thaw ia ka High Level Committee ban khmih ia ki jingkynnoh da u nongmudui ba ki nongkhaii kila pynman ia u dewiong ba tih beain na Meghalaya kum u dewiong ba pynmih na Assam da kaba shna thok ia ki kot ki sla ban ioh khaii ia une u mar sha ka Ri ba marjan” ong ka hukum bala pynmih da ka Iingkashari ki arngut ki Nongbishar.
