Aizawl, Nailur 20 : U Myntri Rangbah (CM) ka Mizoram u Zoramthanga hynnin ka sngi Nyngkong ula kyntu ia ka jingiarap lem jong ka sorkar pdeng hadien ba ka jylla kala ngat ha ka jingeh kaba khraw namar ka jingtyrkhong pisa, ong ka khubor heh sorkar.
U Zoramthanga uba la don mynta ha New Delhi ula pynlong ka jingkhot ia ka Myntri Pla tyngkat ka sorkar pdeng ka Nirmala Sitharaman hynnin ka sngi Nyngkong bad pyntip ha ka halor kane ka jinglong jingman kaba mynta ha ka jylla namar ka jingkyrduh pisa, ong ka khubor.
Na ka liang u CM ka Mizoram ula pan ia ka jingiarap lem jong ka Myntri ka sorkar pdeng ha kaba iadei bad kane ka jingeh kaba ka jylla kala mad, ong ka khubor heh sorkar.
Nalor ka mat kaba iadei bad ka jingkyrduh pisa, u Zoramthanga ula pyntip ruh halor ka mat kaba iadei bad ki phetwir nong Myanmar ha ka jylla bad kyntu ruh ia kane ka Myntri ba kan khmih halor ki lad jingiarap.
Haduh kumba 30,000 ngut ki phetwir nong Myanmar kila wan shong riehtngen ha ki bynta jong ka jylla Mizoram naduh ba ki shipai ka Myanmar kila kurup noh ia ka bor synshar ha u bnai Rymphang jong ka snem ba la dep.
Ia kine ki phetwir la hap ban pynbiang ia ka bam ka dih bad kiwei pat ki jingdonkam da ka sorkar kumjuh da ki kynhun seng bhalang, ki kynhun balang bad ki bor shnong.
Ka khubor heh sorkar kala ong ba na ka liang ka Sitharaman kala pynthikna ha u Zormthanga halor ki lad jingiarap lyngba ka sorkar pdeng namar kane ka jingeh kaba ka sorkar Mizoram kala iakynduh.
Katei ka myntri ka sorkar pdeng kala pyntip ruh sha u CM ka Mizoram ba ka sorkar pdeng kan pyllait ia ka jingiarap pisa kaba T. 600 klur na ka bynta mangtyngka jong u snem 2022-23, kaba thmu na ka bynta ban pyntrei ia ka surok Aizawl by-pass bad ki surok kiba pyniasoh ha ki bynta bapher bapher ka Mizoram kiba hap hapoh ka Prime Minister’s Development Initiative for North-East (PM-DevINE) Scheme.
“Ka sorkar pdeng kan shim ia baroh ki lad ki lynti ban iarap bad ban kyntiew ia ka Mizoram,” ong ka khubor heh sorkar kaba la shim ia ka jingkren jong katei ka myntri ka sorkar pdeng.
Ka Mizoram kala ngat ha ka jingkyrduh pisa namar kiba bun ki daw, kata kaba kynthup na ka jingwan syllad jong ka jingpang Covid-19 bad ka jingbym ioh ia ka bhah lyngba ki khajna ha ka jylla kaba la kot sha ka T. 2,630 klur naduh ka snem 2019-2020 haduh u 2020-2021.
Dang shen u Zoramthanga uba bat ha lade ia ka tnat pla tyngka ula pyntip hapoh ka iingdorbar assembly ba ka sorkar jylla kala ioh pdiang ia ka ram kaba T. 256.396 klur na ka Reserved Bank of India (RBI), hapdeng ka 21 tarik u Naitung bad 2 tarik u Nailar ba la dep.
Na ka liang ki party liang pyrshah kila kynnoh ia ka sorkar Mizo National Front halor ka jingpynjulor noh ia ka ioh ka kot jong ka sorkar jylla kat haduh ba kan ym lah shuh ban khylliew.
