Shillong, Nohprah 16: Ka Hynniewtrep Youth Council (HYC) kala dawa na ka sorkar jylla ban thung da ka high-level technical bad administrative audit ia ka jingsam um ha Shillong hadien ba kala don ka jingkyrduh um kaba shyrkhei na ka jingkynnoh ba ka don ka jingbym biang ha ka jingpyndait ia ki pipe um bad ka jingbym shimkhia ki bor kiba dei khmih.
Ha ka shithi kaba la aiti ha u Myntri ka Tnad PHE u Marcuise N Marak ha ka sngi baar, u vice president ka HYC u Francis G Mawlong ula ong “Ngi kyntu ba dei ban shimkhia bad tuklar mardor ban bthah da ka high-level technical bad administrative audit ia ka tiar ki tar bad ki jingtei ha ka jingsam umbam umdih ha Shillong, ban sdang buh noh da ka por ban bujli ia ki pipe kiba la rim bad sarang, ban tynrong ia ka jingkitkhlieh ia ka jingiai bteng ban don ki jingduna bad ban shim ia ki sienjam ban leh da kaba tyngeh bad ban pynthikna ba kan don ka jingpynwandur lypa ban lait na ka jingmih biang ka jingthud.
Da kaba pynpaw ia ka jingsngewkhia halor kine ki jingthut ba khah khah na ka liang u Bah Mawlong ula long ba kane ka long kum ka jingpang kaba la rim kaba ktah pat ia baroh.
“Baroh ki shnong ki la shong tyrkhong khlem um da ki bun bun sngi kaba la wanrah ia ka jingeh kaba khraw ia ki nongshong shnong kynthup ia kiba la noh ka rta, ki khynnah bad kiba pang ba shitom.”
Ka HYC kala ong ruh, “Kane ka jingthut ka jingpynpoi umbam ka dei na ka daw ba shu ieh kumto da ki bun bun snem, ka rukom plan bad rukom shna ka bym biang bad ka jingbym don ka jingbuh jingkhein kaba biang hapoh PHE Department.”
U Bah Mawlong u la banjur ruh da kaba ong ba ka jingshna maramot tang dep rukom ka la long ka jingmlien bad iai bud kawei hadien kawei pat ka jingthut treikam kaba pyni pat ia ka jingbym lah ban wanrah ia ka jingtrei kaba paka na ka bynta ka jingmyntoi ki paidbah ba bun.
“Ban ioh ia ka um kaba khuid bad kaba thikna ka dei ka hok jong baroh. Ka jingthut ka jingtreikam ym tang ba ka pynthut ia ka jingshakri hynrei ka pynduh noh ruh ia ka jingshaniah bad mih ruh bun ki jingkylli halor ka rukom treikam, ka jingpyndonkam hok ia ka pisa bad ka jinglah treikam bha jong ka tnad,” ula ong.
Ka HYC kala maham ruh ba lada bteng kane ka rukom treikam ka seng kam banse ban iaid noh da ka lynti ka ain.
 kala dawa na ka sorkar jylla ban thung da ka high-level technical bad administrative audit ia ka jingsam um ha Shillong hadien ba kala don ka jingkyrduh um kaba shyrkhei na ka jingkynnoh ba ka don ka jingbym biang ha ka jingpyndait ia ki pipe um bad ka jingbym shimkhia ki bor kiba dei khmih.){kind=link}