Iaroh ki nongpeitkai ia ka phlim “Ha Lyngkha Bneng” u Bah Pradip Kurbah

Shillong, Nohprah 13: Ka phlim :Ha Lyngkha Bneng – The Elysian Field” ka phlim thymmai kaba la ioh khusnam da u Bah Pradip Kurbah u nongshna ia kane ka phlim, la pyni paidbah ha St. Anthony’s College, Shillong.

Ia kane la pynlong da ka Department of Mass Media ha ryngkat ka jingiatreilang bad ka Kurbah Films, Hello Meghalaya bad Ka Knup Creatives.

Haba kren shaphang ka phlim, u Bah Pradip Kurbah ula pynpaw ia ka jingshem halor ka jingiadei ki nongpeitkai bad kam ki jongu. “Man la u briew ki don ia la ka jong ka bynta ban peit ia ka phlim. Ki don ia la ka jong ka jingsngew bad nga tharai kadei kaei kaei kaba khraw ia nga kum u nongshna phlim. Kumta ka long ruh kum ka lad ia nga ban ioh ia ka jingshemphang”.

“Nga dap da ka jingkmen bad nga sngew kyndit, ha ki jaka kaba nga tharai ba ki briew kin ym rkhie, hynrei ki lah ia rkhie bha hangne. Ka khubor ka long, haba pyllait ia kano kano ka phlim, nga shu kwah ba kin wan ban peit ia ka phlim. Nga tip ia ki nongpeitkai ba kidei kiba stad, da ka jingwan jong ki rynsan OTT, nga kyrmen kin pdiang ia kane ka phlim”.

Ka phlim kadei shaphang ka jingim jongki 6 ngut ki briew kiba shong ha ki jaka kynjah ha thain nongkyndong, ka jingthrang, ka jingiateh ka jongki bad ka jingkynriah ia ka jingiadei ka jongki kaba la batai shaphang ka jingim.

Ha kane ka jingpyni ia kane ka phlim la wan ban sakhi da u Nongaibuit ka tnad Social Welfare u Bah Paul Lyngdoh, uba la ong, “Ka pyni ia ka jingkordor jongka jingkhuslai jong ka imlang sahlang kaba im ha ka tnger jongka jingkhyllem. Kaba pyni kaei kaba la jia hapoh Meghalaya.”

Katba u nongak phlim uba pawnam u Melvin Mukhim, uba la ak ha ka phlim ula pynpaw ia la jinshem ka jongu kaba ula ia donbynta bad kane ka projek naduh u snem 2022.

“Ha Lyngkha Bneng ka long palat ban ia ka jingiathuhkhana. Kadei ka jingpyni ia ka jinglong tynrai bad ia ka pyrthei ka bym pat iohi kaba saindur ia ka jingsngewthuh ia ka jingim, kaba la suhthied ha ka rukom pyrkhat pyrdain u Khasi. Ka phlim kadei kaba iaid lang bad ka jingshisha bad ka puriskam, kaba iahap ruh bad ka jingiaid lynti jongka mynsiem briew ha kylleng sawdong kaba long pyrthei bad kaba long Blei. Kadei ka phlim kaba ai burom ia ka jingriewspah ki barim bajah ryngkat bad ka pdiang ia ka ktien ha ka pyrthei ban iathuhkhana”.

Ki nongwan peitkai kila iaroh ia kane ka phlim ia ka jinglong bashisha ka jongka, ka jingwad halor ka jinglong marwei, jingtieng bad jingiap bad ki khyllipmat jong ka jingbiria kaba la phalang ia ka jingbteng jong ka jingrkhie.

Ka jingjop jongka “Ha Lyngkha Bneng – The Elysian Field” dang shen kala ioh ia ka khusnam Golden St. George ha ka Best Film, Best Director, Best Director ha ka 31st Kolkata International Film Festival (KIFF) kaba la long ha u Naiwieng 2025, bad ka NETPAC Award kum ka Best Asian Film ha ka Moscow International Film Festival 2025.

La khmih lynti ba kane kan pynshlur shuh shuh ia kiwei ki nongshna phlim kiba la ioh pdiang ia kum kitei ki jingkyrshan na ka sorkar jylla. Bun tylli ki phlim kiba la ioh ia ka jingiarap bad jingkyrshan kidei kiban sa pyllait paidbah noh ha ki bnai ban wan.