Nongstoiñ, Nailur 18: Ka long kaba pynsngew myllung ban ïoh jingtip ba u samla u ba la tip kyrteng kum u Hubert Paliar, u ba la ïoh ruh ban khur ïa ka nam lahduh ha ka Ri Indïa na ka jingïakop ïakhun kti kaba la tip kum ka Arms Wrestling, ba u la duh noh ïa la ka bor ïoh sngew bad ban ym lah shuh ban kren, ka dei tang namar ka jingbakla ai dawai da ki kmie ki kpa naduh ka por kaba u dang dap shi snem tam ka karta.
La ong ba utei u samla rangbah mynba u dang dap ha kitei ki karta, u ju ïohsngew bad u ju ïakren wat haba u dang rit ka karrta. Hynrei dei ha kawei ka sngi ba ka wan jia ka jingshitom, kaba shu mih ksuid na ka shkor bad haba pyni ha u nongai dawai kynbat, u la kam ba u lah ban pynkhiah. Pynban, mar sien tah ïa kata ka dawai kynbat, la shu phlei snam kynsan kynsan na ka shkor bad naduh kata hi ka por haduh mynta mynne, utei u samla u la kylla long pynban u bym ïoh sngew shuh bad u bym lah ruh wat tang ban kren.
Kumban shu pyntip ba utei u samla rangbah u dei u khun jong u bah Skenar John Kharbani bad I kong Blessila Paliar kiba na ka shnong Mawrok Mawliehbah, kawei na ki shnong nyngkyndong ha ka thaiñ Nongstoiñ West Khasi Hills District.
U dei u ba wan na ka longïing kiba duna ha ka ïoh ka kot, ha kaba ki kmie ki kpa jong u ki dei tang ki nongbylla mynsngi bad bam mynmiet, kiba shisur shidur bad kiba duna jingstad, ki don tang ka pyrthor kba kaba lah ban pynïoh khaw malu mala.
Hynrei ka jingjop bad ka jingkynjoh jong u khun jong ki shaduh ka kyrdan lahduh jong ka ri India, ka la pynkyndit ïa ki kmie ki kpa jong u, namar kim shym la poi pyrkhat.
Haba kylli pyrthew na ki katto katne ngut ki riew rangbah jong katei ka shnong bad haba ïakren bad u bah Cyprian Langrin, u la ong une u samla u tbit bha ruh wat ha ka jingïalehkai kynjat bol.
Lah ban pynkynmaw ba utei u samla rangbah un ïoh ban mihkhmat ïa ka Ri India sha ka ri Turkey ka ban long ha ka 13 tarik u bnai Risaw 2022 na ka bynta ka jingïakhun kti Arms Wrestling.
La ong ba ki kmie ki kpa bad kiba haïing hasem kim kot bor ban pynmih lem ïa ka jinglut jingsep na ka bynta ka bai kali bad kiwei kiwei ki jingdonkam, namar la sngewthuh ba ka jinglut ka long kaba bun namar kata kalong kaba donkam ïa kito kiba don ka mynsiem ban ïarap ba kin noh synñiang kyrpang na ka bynta u ne u samla rangbah.
