Imphal, Nailur 18: Ki bor pulit ryngkat ki shipai na ka tnat bomb squad hynnin ka sngi Saitjain kila pynbthei noh ia u bom ba khlainbor uba dei naduh ka thma bah ba II ia uba la lapdien ha ka por ka jingpyntrei ha ka thain mihngi ka Manipur.
Katkum u nongaiktien ka tnat shipai u Lt Col A.S. Walia, la ong ba ia une u bom uba khia haduh kumba 113 kilo tam la lapdien da ki trai shnong ha ka por ba ki dang tih ia kawei ka jaka ka ba ki pyntrei hapoh Kamjong district ka Manipur ha khappud ka India-Myanmar.
Hadien ba la ioh jingtip halor une u bom na ka liang ki bor shipai ryngkat ki pulit ka jylla kila lah ban pynkynriah noh ia une u bom na ka jaka ba paidbah briew ha shwa ban pynbthei noh ia u., ong u nongaiktien.
Hashwa ban pynbthei noh ia une u bom, na ka liang ki bor pulit bad shipai kila pynthikna shwa na ka bynta ka jingshngain jong ki nongshong shnong da ka ba pynkynriah ia kumba 250 tylli ki longiing nalor ki jingri jingdup ki jong ki, kata kiba don hapoh ka 2Km ka jingjngai na katei ka jaka pynbthei, ong ka khubor shipai.
Ka jingpynbthei noh ia une u bom kala long ka ba seisoh bad khlem kano kano ka jingjia ba sngewsih, ong u nongaiktien.
Ka thain shatei lammihngi (Northeast) jong ka ri India ka dei ka thain ka ba la sakhi ia ki jingialeh kiba jur ha katei ka thma bah ba II namar ki shipai ka Japan kila wan poi ha Manipur bad Nagaland hadien ba kila wan hiar thma ia ki British India.
