Iaid rally ka ACHIK ha Tura | Dawa khang ia ki kyrtong bar jylla ha ka elekshon GHADC

Dawa ban don ia ka Electoral Roll ba kyrpang hapoh ki kyndon ka Sixth Schedule

Tura, Naiwieng 27 : Ka A’chik Conscious Holistically Integrated Krima (ACHIK) ha ka sngi Palei, kala pynlong ia ka rally kaba heh bha ha Tura ba dawa ban bud thik pa thik ia ki kyndon ka Sixth Schedule da kaba khang noh ia ki kyrtong bar Jylla ba kin iakhun ia ka elekshon sha ka Iingdorbar thaw ain ka Garo Hills Autonomous District Council (GHADC).

Ka Rally, kaba la sdang napoh ka Inter-State Bus Terminal (ISBT) bad kut ha Ballongre, kala khring ia ka jingiashimbynta uba bun byllien u paidbah. Palat 100 tylli ki kali kila iaid ryngkat ryngkat ha ka jingrong ba katto katne kilometer, nalor ki seng ki samla, ki Kynthei, ki riew rangbah, ki nongialam shnong, kila iashimbynta ha kane ka rally kaba la pynlong halor ka mat “Iada ia ka hok ki riewlum-Iada ia ka GHADC”.

Ka ACHIK kala ban jur ia artylli ki mat jingdawa : Ka jingkhang noh shisyndon ia ki kyrtong bar jylla ban iakhun ia ka elekshon GHADC haba kdew ba ka jingdon jong ka Council ka long ban iada ia ka jingithuh kyrpang ia ki riewlum, iada ia ka khyndew ka shyiap bad ki ain riti dustur.

Kala dawa ruh ban don noh la ka jong ka Electoral Roll kaba dei beit thik tang ia ki Scheduled Tribe ka Ri-lum Garo, ka ban pynthikna ba tang ki riewlum ki lah ban iakhun ia ka elekshon.

Ka ACHIK kala kyntu ia ka Sorkar Meghalaya, ka Ministry of Tribal Affairs bad u Lat ka Jylla ba kin tuklar lem mardor ha kaban ai jingiada kat kum ka riti synshar bad tehlakam ia kaei kaba ki ong ka “ka jingknieh noh ia ka jingsynshar laitluid ki riewlum”.

“Ka GHADC ka dei kaba la pynkha hapoh ka Sixth Schedule ban iada ia ki trai ri trai muluk bad ban synshar hi dalade ialade. Ban shah ia ki bar jylla ba kin iakhun elekshon kan jop noh ia kaei kaba thmu” ong ki nongialam ka ACHIK ha ka rally.

Ka ACHIK kala maham ruh ba ka jingiakhih kan nang jur lada ia ki jingdawa jong ki ym khein kor, kynthup ia ka jing iashong kyllain mungorkaba heh, ki jingiakhih kiba jur bad ba lah ruh ban poi sha ka jingiakhun mukotduma.

Ka ACHIK kala pyntip ruh ba kan sa aiti ia ka dorkhas sha u Myntri Rangbah ka Jylla Conrad K Sangma, u CEM ka GHADC bad sha u Lat ka Jylla ba kin shim ia ka lynti ban pynbeit noh mardor.