Shillong, Naiwieng 27 : U Myntri uba khmih ia ka Tnad Aiñ u Bah Lahkmen Rymbui hynne ka sngi ula ong, ba ka sorkar jylla kan sa khmih bniah bad kan sa leh katkum ka jingshah jong ka aiñ, pyrshah ia kito kiba sah be-aiñ ha Maxwellton Estate bad ha Mahadev Khola.
U Bah Lahkmen Rynbui ula pynpaw ia kane hadien ka jingiakynduh bad ki Nongialam ka KSU Seng Kmie kiba la dawa ban kyndang noh ia ki briew kiba sah be-aiñ ha Maxwellton Estate bad ha Mahadev Khola.
“Ki nongialam ka KSU kila dawa ba ka sorkar ka dei ban kyndang noh ia ki briew kiba sah ha Maxwelton Estate khlem da ioh bor namar ba ka jingdon jong kine ki nongshong hangto khlem ki nongpeit ka wanrah ia ka jingbym shongshngain bad sheptieng ioh kan kylla long kum ka ktem ka ban pynmih ia ki jingsniew ki ban ktah ia ka suk ka sain hapoh Shillong bad ha ka jylla” ong u Bah Rymbui.
“Kumba ngi sngewthuh ki don ki longiing kiba sah hangto bad u don uba kam trai ia kane ka jaka hynrei ka iingbishar kala ai ia ka rai. Ngin sa khmih bniah ia kaei kaba ngi dei ban leh bad ngi hap ban leh katkum ba shah ka aiñ” ula bynrap.
Ha kaba iadei bad ka jingdawa ban kyndang ia ki briew ba sah be-aiñ ha Mahadev Khola, u Bah Rymbui ula ong, ba kadei ka sien kaba nyngkong ba un iohsngew shaphang kane ka jaka, kumta un sa lum ia ka jingialang halor kane ka jingdawa.
“Ngan sa lum ia ka jingialang bad ka tnad Revenue bad DC Revenue ban snewthuh ia ka jinglong jingman jong kitei ki ar tylli ki jaka bad kaei kaba kin leh, khnang ba ka dei ban don ka lynti kaba kin iaid nangne shakhmat” la ong u Bah Rymbui.
