Guwahat, Nailur 17 :Ki bor pulit ka Guwahati kila ioh ban kem noh ia u draibar jong u Doktor Buddhaditya Bhattacharya, halor ka jingkynnoh donkti ha kaba rahbor ia ka khun kaba dang 10 snem jong u hadien ba ula leit buh ia ka sha ka tuition class ha kane ka sngi Palei ba la lah.
Ia une u briew la tip kyrteng kum u Narahari Barman ia uba la kynnoh ba ula dawa T. 7 lak na ka bynta ban pyllait ia ka khun ka jong u.Une u briew uba la shah kynnoh donkti u dei na ka thain Barpeta ka Assam bad uba trei kum u nongniah kali na ka bynta u doktor Buddhaditya Bhattacharya uba shong ba sah ha ka sorbah Guwahati.
Katkum ka khubor pulit, kumba long ha ka sngi kaba hashwa, u Nara Hari Barman ula mih napoh ka iing ha ryngkat bad ka khun rit jong u doktor na ka bynta ban leit buh sha ka tuition class ha ka por kumba 7:30 jan miet, hynrei ula jah rngai noh ha ryngkat kane ka khynnah.
Hadien u Nara ula phone sha ka kmie jong kane ka khynnah bad dawa pisa T.7 lak. Hadien kane ki bor pulit mardor kila pynlong ka jingthwet ia une u briew bad lapdien najan kawei ka temple ha ki bynta jong ka Khanapra bad ioh ban pyllait noh ia kane ka khynnah.
Kawei pat ka jingjia kam rahbor ba shyrkhei kala jia ha ka 30 tarik u Jymmang ba la dep hadien ba ka jingpyrshang ban rhbor ia kawei ka khynnah kaba dang khie samla kala pulom noh hajan ka skul St. Xavier’s Higher Secondary School hapoh ka sor rit Duliajan.
Katkum ki khubor la ong ba kane ka jingjia kala wan jia hadien ba ka kynhun jong ki sawngut ki runar kila wanpoi hapoh katei ka skul da kali bad pyrshang ban rahbor ia kawei ka khynnah da kaba patan jubor ia ka.Hynrei kane ka jingpyrshang ka jong ki kala pulom noh hadien ba ki nongshong shnong kiba don ha katei ka jaka kila wan ban aijingiarap bad pynpulom ia kane ka jingthmu jong kitei ki runar.
Ha kane ka jingialeh markylliang hapdeng ki nongshong shnong bad kine ki runar kala wanrah ruh ka jingmynsaw ba malu mala ia kane ka khynnah, hynrei kine ki runar kila ioh ban phet krad noh na katei ka jaka.
Halor kane ka jingjia na ka liang ki bor pulit ka Duliajan kila pynlong ia ka jingthwet kaba jur ban ioh kem ia kine ki briew, hynrei kat haduh mynta ym pat shym la lapdien ia ki.
