Shillong, Nailur 17 : Ka Rangdajied United FC ka la ioh ban pynliem haduh 3-2 kol ia ka Mawlai Sports Club ha ka jingiakhun jong ka Shillong Premier League kaba long hynne ka sngi ha madan Third Ground Polo.
Lah ban kdew hangne ba ka Mawlai kadei kaba bat ia ka kyrdan kaba halor duh jong ka miej ia khein point bad la pyntikna ruh ba kane ka kynhun kan ioh ban rah ia ka nam lahduh mynta ka samoi.
Haba phai sha ka jingiakhun ka Rangdajied tang ha ka minit kaba 20 ka la ioh ban thep ia ka kol kaba nyngkong lyngba u Wanlamsuk Nongkhlaw bad tang ha ka minit kaba 24 ka la ioh ban thep ia ka kol kaba ar lyngba u Orestarwell Langshiang.
Hadien kane tang ha ka minit kaba 25 ka Mawlai ka la ioh ban pynphai noh shi kol lyngba u Oversharp Iawphniaw kaba pynkut ia ka kylla step da 2-1 kol.
Ka jingiakhun ha ka kylla miet ka la nang shongshit shuh shuh hadien ba u Dibormi Kassar u la ioh ban thep ia ka kol kaba lai na ka bynta ka Rangdajied United. Ym slem hadien kane kata tang ha ka minit kaba 81 ka Mawlai ka la ioh ban thep biang sa shi kol bad kane ka la neh haduh ba kut ka por ialehkai ha kaba ka Rangdajied ka la ioh ban khur ia ki lai point.
Katei ka kynhun watla ka jop ha katei ka sngi hynrei ka dang neh beit ha kyrdan kaba lai da ki 2t point hadien ka Langsning.
Ka jingiakhun ha ka sngi Baar pat kan long hapdeng ka Malki pyrshah ia ka Lajong FC ha ka por 3:15 janmiet.
