Shillong, Naiwieng 22: Palat 2000 ngut ki nos na Meghalaya kila pynkhreh mynta ban leit trei shabar ka Ri.
Ia kane la pyntip da u Myntri Rangbah ka Jylla Conrad K Sangma haba plie ia ka CFI (Caring for India) Centre ha Nonglum, Umroi, Ri-Bhoi ha ka sngi Saitjain.
Haba kren halor ka jingnang kiew ka Jylla ha ka jingplie lad ia ki Nos ban leit trei shabar ka Ri, u Conrad ula ong “Ha ki snem bala leit, 37 ngut ki nos kila leit sha Japan, jan kot 30 ngut kila leit sha Singapore bad ka batch ba nyngjong kin sa leit shen sha Germany”.
Ula bynrap ba watla kine ki lad ki lynti kila don mynshuwa, “ka don pat ka jingbym lah ban pynbiang hapdeng ka lad ba don bad ki briew kiba kloi ban leit”.
Ula batai ba ki sienjam bala shim da ka Sorkar lyngba ki Job Fairs, ki jingai jinghikai ia ki ktien ki thylliej bad ka jingkyrshan ki longiing longsem, kala lah ban pyndap ia kane ka jingduna kaba don baroh shikatta.
Haba sam jingtip ia ka jingmyntoi ba kine ki nos ki wanrah, ulaong “Kine ki nos kila lah ban phah mar kumba T. 1 lak shibnai shala ki bahaiing hasem…kata T.4.8 klur ha ka shisnem tang na ki 40 ngut ki nos”.
Ia ka CFI Centre la wanrah ban long ka jaka ka ban saindur ia ki samla ba kin long kum ki nongialam bad ban wanrah ia ki jingkylla ha ka imlang sahlang lem bad ka roi ka par kaba kynthup lang ia baroh.
U Myntri Rangbah ula ai ka jingiaroh ia ka jingiohi jngai halor ka jingseng ia ki CFI Centre bad iaroh ia ka jing pyrshang jong ki nongseng ban thaw ia kane ka jaka ka ba pynleit jingmut ban sei ia ki nongialam bad ka jingshakri ia ka imlang sahlang.
Ula pynkynmaw ia ki inghikai jong u Kpa jong u, uba ju pynkynmaw ia u ba ka “Ka jingthmu kum ki nongialam paidbah ka dei ban sdang da ka jingthmu ban shakri ia ki paidbah…ym ia ka kyrdan, ym ban myntoi shimet ne ka pisa tyngka”.
Halor ka CFI Nursing College, u Myntri Rangbah ula pyntip ba kala don ka jingkyrpad ban ai jaka na ka bynta ban pynheh ia ka bad kular ruh ia ka jingkyrshan ba pura na ka Sorkar.
“Ai ba ngan kular sa shisien ia phi ba ka Sorkar kan pynthikna ba ngin ai ia ka jaka ba donkam khnang ba phin lah ban tei ia ki jingtei ba donkam” ula ong.
U Myntri Rangbah ula pynshlur ia ka CFI ba kan pynrung ruh ia ka jingai jinghikai iaki Ktien ki Thylliej hapoh ka jingpule Nos, haba kular ba ka Sorkar kan iatreilang bad kane ka jaka pule ban lah pynurlong ia ka.
