Shillong, Naiwieng 22 : Ka Dorbar Shnong ka Mawlynnong, ha ka sngi Saitjain, kala pynbna ba ka Shnong, kaba la bna nam ia ka jingkhuid ha ka dewbah Asia, kan khang noh ia ka jingwankai ki nong shangkai/nongjngohkai ba shisngi ha ka Sngi U Blei, ka ban sdang naduh u Kyllalyngkot 2026.
Ia kane ka rai, la shim hadien ka jingiashong pyrkhat bha, da ka jingthmu ba ailad ia ki nongshong shnong ba kin leit sha ki Iingmane khlem ka jingpynthut bad ban pynneh pynsah ia ka nam ka burom jong ka Shnong.
“Ha Mawlynnong, ka Sngi U Blei ka dei ka sngi kaba jan baroh ki leit sha ki Jingiaseng ha ki Iingmane baroh shisngi, kumta kin ym lah ban ai ia kano kano ka jingshakri la pynbit pynbiang ia ka jingdonkam jong ki nongwan shangkai” ong ka Dorbar Shnong.
Naduh u Kyllalyngkot 2026, ka Shnong Mawlynnong kan plie ia ka jingwan ki nongwankai tang ha ka sngi Nyngkong haduh ka sngi Saitjain.
Ha ka sngi U Blei, baroh ki kam bad ki jingshakri ba iadei bad ki nongwan shangkai, kynthup ki restaurant, ki duan bad ki painkhana paidbah kin khang khyrdep lut.
Kane kan ym treikam pat ia ki nongjngohkai kiba la buh lypa ban sahmiet ha ki guest house lane ki homestay ha ki sngi pohia bad pynjlan ia ka jingsah jong ki haduh ka sngi U Blei bad kumjuh ruh ia kito kiba kwah ban buh kamra ha ka miet sngi U Blei,
Haba iadei bad kine, ka jingkitkhlieh ia ka jingshakri bad ka jingpdiang sngewbha kan shong beit ha ki trai jong ki Guest House/Homestay.
Ka Dorbar Shnong Mawlynnong ula kyntu ia ki nongwankai ba kin burom ia ka rai jong ka Shnong bad ban iatreilang ruh bad ki nongshongshnong.
