Nongpoh, Naiwieng 19: Uwei u rangbah ula iap bad arngut ki briew kila mynsaw jur ha ka jingiatynrah kali kaba la jam bha hapdeng ka Maruti Alto bad ka Toyota Innova ha ka sngi sngi Balang ha NH-6, ha 12 Mile, Byrnihat.
Kane ka jingjia kala jia ha ka por 10:30 baje mynstep. Kane ka Maruti ba don u nombor ML10-A-7049 ka dei kaba mih na Byrnihat ban leit sha Umtyrnga katba ka Toyota Innova ML10-S-0011 ka dei kaba dang kiew sha Byrnihat.
Ki Pulit ki iathuh ba ka jingiatynrah kala jia namar ka jingpynher sted palat jong u nongniah Alto haduh ba um shym la lah tehlakam ia ka kali ha 12-Mile bad jam sha shiliang ka surok ha kaba ula leit ban tynrah beit beit ia ka Innova ba dang wan mar pyrshah.
U nongniah jong kane ka Alto ba kyrteng u Helin Lyngdoh ula khlad bad arngut ki briew kiba shong ha ka Innova ila mynsaw bad la pynkit mar mar ia ki sha Guwahati.
