Shillong, Naiwieng 19 : Ka kynhun ki runar ki bym lah ban tip ki dei kiei, kila pynpra dusmon ia u durmot jong u Jisu Khrist ba pynieng hapoh ka Syiem Jingsuk Parish, Amlarem, West Jaintia Hills District.
Kat kum ka kyrwoh na ka KSU War Jaintia Circle, kane ka jingjia kala jia ha ka 13 tarik Naiwieng 2025.
Ka KSU kala pynrem jur ia ka jingleh riewkhlaw ki runar kiba pynthohbria bad pynjah burom ia ka thain da kane ka kam bymman bad dawa ia ki bor ka ain ba kin pynkloi ban thwet bad tohkit bniah ia ki briew ba donkti nalor ban pynngat ia ki kat kum ki kyndon ain.
Ha kajuh ka por, ka KSU ka dawa ia ki briew ba donkti ba kin leit pyndem ialade hakhmat ki Pulit ka Amlarem Police Station haba pyntip ba ka Seng kan donkti ban wad lang ia kine ki briew khnang ba kan ioh leh ia kaba donkam.
Ka KSU War Jaintia kala pynsngew ruh ba ka thain War Jaintia ka dei ka thain ka bym ju don kata ka jingsngewpher niam ne sngew pher Jaidbynriew hynrei kum kane ka jingleh dusmon ki briew, ka seng kam lah ban pdiang da lei lei ruh.
Ha kajuh ka por, kane ka Seng kala kyrpad ia ki paidbah ka thain ba kin long kiba iai pynneh ia ka shongsuk shong shngain.
