Guwahati, Naiwieng 17: Ka International Crimes Tribunal ka ri Bangladesh, ka la rai pyniap ia ka Myntri Rangbahduh barim ka Ri, ka Sheikh Hasina halor ka mukotduma ba kynnoh donkti ha ki kam pyntriem pyrshah ia ka longbriew manbriew ha ka Ri.
Ka Iingbishar kala lap ba ka Myntri Rangbahduh barim ka donkti ban hukum thwet bad pynshitom bein iaki samla pule kiba pynlong iaka jingïakhih ha u snem ba la dep.
Ka ïingbishar ka la rai pynïap ruh ïa u Asaduzzaman Khan Kamal, Myntri kam pohïing barim ka ri Bangladesh halor ki kam pyntriem pyrshah ïa ka longbriew manbriew.
Ka International Crimes Tribunal, ka la ai ruh ia ka rai pyrshah ia ki arngut ki nongiarap jong ka Hasina kata u Asaduzzaman Khan Kamal u Myntri kam pohiing barim bad u heh pulit barim, u Chowdhury Abdullah Al-Mamun, bad la lap ba baroh arngut ki donkti ha ryngkat bad ka Hasina.
Ka Tribunal, ka ïingbishar jong ki kam runar hapoh ka ri Bangladesh, ka la pynmih ïa ka rai hapdeng ka jingpahara kaba jur bad hapdeng ka jingbymdon jong ka Hasina hadien ba ka la phet krad sha India ha u Nailar 2024.
Ka seng Awami League jong ka Hasina ka la shah khang ban ïakhun pyrshah iaka rai, kaba la pynmih ia ka jingsheptieng ba kane ka rai ka lah ban pynmih ïa ka jingkulmar kaba thymmai ha shwa ka jingthep vote.
La pynbna ba ka Hasina bad u Kamal ki dei ki nongphetwir bad la bishar ia ki watla kim don haka por bishar.
Ka ïingbishar ka la kdew ba ka Sorkar ba ialam daka Hasina kam shym la shimkhia ia ki jingdawa jong ki samla pule, bad ha ka jaka ban sngap ia ki samla pule, ka Hasina ha katei ka por, kala pynrem iaka jingiakhih bad ka kren ia ki kyntien pynjah burom da kaba kdew ba ki samla pule ki dei ‘Razakars’, ka kyntien pynjah burom kaba la pyndonkam ha Bangladesh.
Ha ka jingbishar, ki nongmudui ki la aiti ïa ki sakhi sabut ba ka Myntri Rangbahduh kala bthah ban pyndonkam da ka bor ban pynduhjait ïa ka jingïakhih ba la ïalam da ki samla pule ha u bnai Naitung bad Nailar 2024.
La mihkhmat ia ka Hasina da u nongiasaid ain ba la thung da ka Sorkar uba la iathuh ha ka iingbishar ba ki jingkynnoh pyrshah ia ka Myntri Rangbahduh ki long ki bym don nongrim bad u la kyrpad ban pyllait ia ka.
Ka Bangladesh mynta ka don hapdeng ka jingkhihwin hashwa ban pynbna iaka rai ha kaba ym duna ia ka 30 tylli ki bom kila bthei bad 26 tylli ki kali ki la shah thang ha kylleng ka ri, ha kine ki khyndiat sngi ba ladep watla ym shym la don kano kano ka jingjia ba sngewsih.
Ka Hasina, ka la phet na Bangladesh, ha ka 4 tarik Nailar 2024, hapdeng ka jingjur ka jingkulmar bad naduh katei ka por, ka la sah ha India. La sngewthuh ruh ba u Kamal ruh u don ha India.
Ka sorkar ba shipor, kaba la ialam da u Muhammad Yunus, ka la thoh shaka Sorkar India ban aiti iaka Hasina, hynrei haduh mynta, ka India, kam pat jubab satia.
