Guwahati, Naiwieng 17: Ki samla ka shnong Tinsukia ki la ioh bat haduh 44 ngut ki briew ba ishankhmat kum ki briew ba don jingthmu eiei sha lyndet, ha ka step sngi Nyngkong na Tinsukia Raiway Station.
La iathuh ba ki 44 ngut ki dei kiba wan na Jammu and Kashmir bad ki la wan sha kane ka thain ha ka jingialam uwei u Contractor.
“Ngi la bat ïa ki 44 ngut ki briew na Tinsukia Railway Station. Haba kylli, ki la ong ba ki dei na Jammu and Kashmir bad ki wan sha kane ka shnong ban bylla lyngba uwei u Contractor uba kyrteng u Kadhim Ali u ba ialam iaki na Arunachal Pradesh,” ong ki samla trai shnong ka Tinsukia.
U la ong, “Ngi la pyntip sha ka RPF bad ka GRP. Ngim tip na kano ka jaka ba ki wan hynrei ngi lap ba ki long kiba ishankhmat ha ka rukom iaid jong ki. Bun ki jingjia ki jia ha India. Ka jingbthei bom ha Delhi ka dei kawei na ki nuksa ha kaba ki Doktor na Kashmir ki la donkti ha ka jingbthei”.
“Ngi la wan na ka bynta ka jingpyntrei ha ka transmission line. Ngi dei ki nongtrei ba la siew tulop bad ngi wan shane na ka bynta ka jingtrei kaba saw bnai. Ngin sa leit pyntrei ia ki tower electric ha Arunachal Pradesh. Ngim tip eiei hynrei u Contractor Kadhim Ali uba wan ialam ia ngi” ong u Bashir Ahmed, uwei na kine ki briew ba shah bat.
U la ong, “Kiba bun na ngi ki dei na Doda bad Kishtwar distrik jong ka Jammu and Kashmir. Ngi la wan shane da ka rel bad ngi dang poi mynta”.
Haduh mynta ym pat leh iaka jingpynshisha ia kine ki briew ba bat na Tinsukia Railway Station.
Hadien ka jingkhynra ia ki nong Bangladesh baa wan beain ha Assam, la ioh bat bun ngut ki briew na ki jaka bapher bapher jong ka Assam.
U Myntri Rangbah ka Assam u Himanta Biswa Sarma u la dep ban maham halor ki nongwan buhai shnong beain daka ba ong ba kadei ka jingma ia ka jingshngain jong ka ri.
