Shillong, Naiwieng 17 : U Myntri Rangbah ka Jylla Conrad K Sangma, ula pyntip ba ka Jylla Meghalaya kala pynkhlain ia ka jingiatreilang bad ka ri Japan ha kiba bun ki kam.
U Conrad ula pyntip ia kane haba kren ha ka jingialang plie ia ka Japanese Language Training Programme bala pynlong da ka Meghalaya State Skill Development Sociaty, Department of Labour, Employment & Skill Development ka Jylla, ha ka sngi Nyngkong ha Moint View Builsing, Barik, Shillong.
“Ka rukom pyrkhat jong ngi ka long kaba shai bha bad ba da pynleit jingmut bha…ngim kwah ban don ka jingiateh bad bun ki ri ka pyrthei namar lada phi pyrshang ban iatejlok bad baroh, phin nym don satia ia ka jingiadei badno badno ruh” ula ong haba bynrap b aka Japan bad ki Jylla ka Thain Shatei Lam Mihngi ki don ka jingiasyriem ha kiba bun ki liang la ka dei ka bam ka dih, ka kolshor bad ka ri Japan ka dei kaba la iatreilang bad ka ri India la bun bun snem.
Haba kren ia ka jingiaid lynti ka jingiatreilang bad ka Japan, u Myntri Rangbah ila ong ba arsnem mynshuwa tang arngut ki nurse la phah sha Japan bad haduh mynta, kila don haduh 37 ngut ki nurse ha Japan bad bun kin sa nang leit ha kine ki bnai ban wan.
“Ki nurse jong ki kiba trei ha Japan mynta kila don ha ka N4 Grading bad ngi kyrmen ba ki Nurse jong ngi kin poi ha ka N3 Grade ba kin ioh ka tulop ba kham heh. Ki nurse jong ngi kila lah ban phah pisa shala iing haduh T. 1 lak bad ka jingkylliang pisa ha ka Jylla jong ngi lyngba kine ki 37 ngut ki nurse kala kot kumba T.5 klur shisnem” ula ong.
U Myntri Rangbah ula ong ba ka Sorkar ka kwah ban ai ia ki kali sha ki samla ka Jylla ba kin leit sha Japan ym tang ban kamai jakpoh hynrei ban ioh ruh ia ki jingshemphang bad ong “Dei hangne ba ka jingiatehlok hapdeng ka ASEAN Group bad ka Sorkar Meghalaya kala mih bad ngi kum ka Sorkar kila pynbeit lut ia kiei kiei baroh”.
U Myntri Rangbah ula pyntip ruh ba 37 ngut ki nurse kiba don ha Japan kila hap ban leit hikai pyntbit ia ka ktien Japan ha Bangalore kaba long haduh hynriew bnai. “Phi long kiba donbok namar mynta phin ioh ia ki jinghikai pyntbit ha Shilllong” ula ong.
Haba pdiang ia ki arngut ki nonghikai na Japan, u Myntri Rangbah ula ong ba watla kin don ki jingeh, ka Sorkar bad ki nongshongshnong ka Jylla kin ialeh katba lah ban pynthikna ia ka jingwan sah ba suk ka sain jong ki ha Jylla.
Haduh 86 ngut ki samla pule kila pynrung kyrteng ha kane ka Japanese Language Training Programme ba hynriew bnai.
Kiba la don lang ha kane ka jingialang plie ki kynthup ia u Myntri ka Tnad Labour Bah Methodius Dkhar bad ka Chairman bad CEO ka ASEAM Group Co Ltd Nishukwa Toshiaki San nalor ki nonghikai ka Japan bad ki Ophisar ka MSSDS.
