Dawa ka HYC ban pynsangeh ia ka jingkynnoh shna temple ha phyllaw ka CBI

Shillong, Naiwieng 14 : Ka Hynniewtrep Youth Council (HYC) kala dawa ia ka jingpynshai ba mardor bad ban pynsangeh shipor ia kano kano ka jingkynnoh shna temple hapoh ka phyllaw jong ka Ophis ka Central Bureau of Investigation (CBI) ha Mawdiangdiang, kaba hap ha New Shillong Township.

Ha ka mudui bala phah sha ka CBI Head of Branch ha ka sngi Thohdieng, ka HYC kala kynnoh ba ka jingtei kaba la pyntip ba dei ka temple kala ieng hapoh ka phyllaw jong ka CBI, kaba pynmih ia ka jingsngewkhia ia ka jingpynkhein ia ka jingburom kumjuh ia ka jingngeit niam kat kum ka riti synshar ka Ri bad ki ain ka Jylla.

Kala dawa ia ka CBI ba kan pynshisha mardor halor ka jingtei ia kano kano ka jaka mane blei hapoh ka phyllaw jong ka CBI.

“Kat bym pat pynshisha, baroh ki kam ba iadei bad ka jingtyrwa lane ka jingtei ba dang iaid ia ki jaka mane blei dei ban pynsangeh shuwa mardor, ban khanglad ia ka kam ka ban buh ha ka jingeh ban pynkylla biang ha kane ka phyllaw lane kaba lah ban long ka jingpynkhein ia ka ain” ong u President ka HYC Roykupar Synrem haba bynrap “Lada shem ba ka jngtei kala sdang khlem da ioh jingbit, dei ban leh eiei kat kum ka Public Premises (Eviction of Unauthorised Occupants) Act, 1971 bad ban leh eiei kat kum ki kyndon ba iadei ha Jylla Meghalaya ban weng ia kine ki jingtei ba khlem ioh jingbit bad ban pynneh ia ka phyllaw kumba ka long”.

Ka HYC kala kyntu ia ka CBI ban ai ia ka jingpynshai da ka jingthoh hapoh ka artaiew, ba pyni ia ka jinglong jingman ba mynta kumba ka long, ki jingai jingbit bala ai lada don, bad ki sienjam bala shim ban pynthikna ia ka jingbud ryntih ia ka riti synshar bad ka ain.

Ka HYC kala ban jur ba ka jingmudui kam long pyrshah ia kano kano ka jingngeit niam hynrei ka thmu ban pynneh ia ka jinglong bym shah shiliang ia ka jingngeit niam bad ka jingioh jingshaniah na u paidbah ia ka CBI, ka Tnad tohkit ka bym iashah liang.