Shillong, Naiwieng 06: Hadien ka jingioh ban rah ia ka nam lahduh ka lympung Shillong Premier League, ka kynhun ialehkai ka Langsning FC kan khreh ban mih aireng pyrshah ia ka Rangdajied United FC, ha ka jingiakhun jong ka semifinal ba nyngkong ka lympung ialehkai ba thymmai ka SSA Super Cup, kaba la buh ban long lashai ka sngi ha SSA Stadium, Polo ha ka por 5 baje janmiet.
Ka SSA Super Cup, kadei ka lympung ialehkai ba pynmih thymmai mynta ka snem da ka Shillong Sports Association, kaba long kum shi bynta ban pynkha sa kawei pat ka kyrdan ialehkai, ha kaba tang 6 (top 6) tylli ki team kiba la paw bad khlain na ka lympung ialehkai ka Shillong Premier League, ki ioh sa ia kane kawei pat ka kabu ksiar ba kin iakhun ha kane ka lympung.
Ha kabne ka kynti, ka Lasngning FC bad ka Shillong Lajong FC, kiba long ki lahduh bad ba warn ba-ar ha ka SPL, ki la ap lypa ha ka semifinal, katba ka Rangdajied bad ka Mawlai ki la hap ban iaid lyngba ka play-off ban poi sha ka kyrdan iakhun ka semifinal.
Na ka liang ka Rangdajied United FC ki la lah ban pynliem noh ia ka Nangkiew Irat da 3-0, katba ka kynhun ialehkai ka Mawlai SC ka la pynliem ia ka Sawmer lyngba ka tie breaker kaba 5-4.
Ha ka por ba iakhun ha ka lympung jong ka SPL, ka kynhun ialehkai ka Langsning FC ka la lah ba kan pynliem da 4-0 ia ka Rangdajied United FC, bad ka dawbah kaba pynlong ia ka ban rah ia ka nam lahduh ka SPL ka la wan hadien ba ka la ioh ba kan khur pura 20 point haba ia nujor bad ka kynhun ialehkai ka Shillong Lajong FC bad ka Mawlai SC, kiba la ioh ban ia khur mar 19 point.
Ka lynti iaid ia ka kynhun ialehkai ka Langsning FC ka long ba ka la lah ba kan khur haduh saw sien lynter ki nam jop bad ban shah rem tang shisien, kaba kren shai ba kum ka kynhun na bynta ka jingiakhun kaba lashai ka Lasngning FC ka kham i-biang bad ba don ka jingkyrmen ban lah ban jam sha ka phainal.
Ha ka sngi kaba bud, ka jingiakhun ia ka semifinal kaba ar jong kane ka lympung kan long hadpeng ka Shillong Lajong FC pyrshah ia ka Mawlai SC, ha kaba la khmih lynti ba kane ka jingiakhun kan long kaba ia biang bor bad kaban iakhaid bha.
Kumban shu pynkynmaw ba ha ka jingiakhun kine ki ar kynhun ha ka SPL, ka Mawlai kaba la tam shakhmat da 3-0, ka la mad pynban ia ka nam rem kaba long da 4-3 hakhmat ka Shillong Lajong FC, bad kane ka jingiakhun ka iai neh sah ha ka jingmut ka jingpyrkhat jong ki paidbah ba la sakhi bad ba la peit ia kane ka jingiakhun.
