Shillong, Naiwieng 03 : U Myntri ka Tnad Pule Puthi Lahkmen Rymbui ha ka sngi Nyngkong, ula ong ba ka Tnad Pule Puthi kan iatreilang bad kino kino ki bor Sorkar ban pynthikna ia ka jingshngain jong ki khynnah kynthei ha ki phyllaw iingskul bad ha ka imlang sahlang.
“Ka Tnad Pule Puthi kan iatreilang bad kino kino ki bor Sorkar ban khmih ia ka bha ka miat…bad ka jingshngain jong ki Khynnah Kynthei ha ki phyllaw iingskul bad ha ka imlang sahlang ruh kumjuh” ong u Bah Rymbui haba iakren bad ki nongthoh khubor.
U Myntri ula pynpaw ruh ia ka jingkut jingmut jong ka Tnad ba u khmih halor ka bha ka miat da kaba ong “ Ngi pdiang ia kino kino ki sienjam jong ka Sorkar Jylla ban peit ia ka bha ka miat ki khynnah skul bad ka bha ka miat ki khynnah kynthei”.
“Haba nga kren halor ka bha ka miat, kam dei satia tang ha ka pule puthi hynrei ha ka jingim jong ki ba manla ka sngi” ula pynpaw.
