Shillong, Risaw 31: Ha ka Ri kaba ki surok ki dei ki jaka ba ju iohi bha ia ki nongkhrong, hynrei ka Meghalaya ka ieng kum ka Jylla kaba kham niar ban iohi ia ki nongkhrong ha ki surok. Ka daw kam dei na ka jingpyrkhing ia ki kyndon ain, hynrei kadei namar ka jingdon ia ki jinglong kiba kyrpang kiba la suhthied ha ka imlang sahlang bad ka jingdon ia ki prokram kiba iadei bad ka bha ka miat, kaba pynthikna ban ym don wat uwei u riewshimet, khynnah, longkmie ne kiba don jingduna ha ka met kin shah ieh khlem ka jingioh ia ka jingsumar.
Haba kren halor ka jinglong phylla ka rukom leh hapoh ka jylla, ka Kong Camelia Doreen Lyngwa, ka Director jong ka Tnad Social Welfare, kala batai ba ka jingjop jong ka Meghalaya kala mih lyngba ka jingiatreilang hapdeng ka tnad Social Welfare, ki kynhun ha ka imlang sahlang bad ki polisi treikam ka Sorkar kiba kdup lang ia baroh.
“Ngi dei ka imlang sahlang bad ka sorkar kaba don ia ka jingshimkhia wat ia ki briew kiba wan na kiwei ki jylla ruh. Ym shim la don kino kino ruh ki ban ym ioh jingiarap” ong ka Kong Lyngwa haba bynrap “Kat shaba phai ha Meghalaya, ngim don satia ia ki nongkhrong, khamtam eh na ki jaidbynriew riewlum namar ba ngi shimkhia ban sumar sukher”.
Lyngba ka jingshakri jong ki Shelter Homes, Observation Homes bad ki Rehabilitation Center kiba kyrpang, ka jylla ka ai jaka ia ki khynnah kiba donkam ia ka jingsumar sukher bad ka jingiada, ki kynthei kiba la ioh ban pyllait na ki surok bad ki riewshimet kiba don ia ka jingpang ha ka bor pyrkhat pyrdain.
Na ka bynta ki khynnah kiba wan na ki longiing kiba duna ka ioh ka kot ne ki iing kiba la pait la pra, ka Meghalaya kala pyniaid ia ki 6 tylli ki Shelter Unit kiba kyrpang, ha kaba ki ioh ia ka jingnang jingstad, ka jingiasyllok bad ki jingai jinghikai pyntbit ia ka sap ka phong.
“Ngi kwah ban pynduna iaka jingkhuslai ha ka jingmut jingpyrkhat. Kiba bun na ki khynnah ki jong ngi, kila nang ban suh jain bad ban thain jain, ka jingthain kti ka jongki ka long kaba paka bha bad ia ka jingiohnong ka jongki la kynshew ha ka bank account ka jongki hi,” ong ka Kong Lyngwa da ka jingsngew sarong.
Ka jylla kala ai ne pynbiang ia ki jingdonkam kiba kongsan na ka bynta ki kynthei ruh kumjuh, kum ka ‘Shakti Sadan’ bad ‘Shakti Niwas’, kaba ai jaka sah mynta ia ki 75 ngut ki kynthei ne longkmie kiba la don jingduna ha ka bor pyrkhat bad kiba bun hi kidei kiba nabar ka jylla Meghalaya. Kine ki Center kidei kiba la pyniaid da ki nongsumar kiba la ioh ia ki jinghikai pyntbit kiba pynbiang ia ka bam, ki jain ki nep bad ka jingkyrshan ha ka bor pyrkhat.
Ka Kong Lyngwa kala banjur ba ka shnong ka thaw kala leh ia ka bynta kaba kongsan bha, khamtam ha ki jaka riewlum ha kaba ki khunswet kila shah sumar bad ri ha la ki bahaiing bahasem ne ha ka Kur. Ha ka por ba ioh shuti skul, bun ki khynnah na ki Shelter Homes ki leit phai sha la ki meiieid-paieied ne ki bahaiing bahasem, kaba pyni shai ia ka jingkhlain jongka kolshor ki Khasi kiba shim jait na ka kmie.
Man la ki khynnah kiba shah sumar sukher ha ka jylla ki ioh T.4,000 man ka bnai, kaba la kyrshan lang da ka ophis jong u Chief Minister bad ka Tnad Social Welfare. Nalor ka jingai jingiarap da ka pisa, ka jingpynleit jingmut ka long ban pynneh iaka burom, ka jingkynthuplang ia baroh bad ban tei ia ka longrynnieng bad ia ka jingsngew ka jongki.
Haba ka Meghalaya ka iaid shakhmat kum ka jylla kaba kmen ne “Happiness State”, ka long kaba jar jar hynrei ka long ka nuksa kaba khlain pat kum ka rukom synshar kaba don ia ka jingsngewsynei bad kane ka long u mawmer ban don ia ka jingkitkhlieh ia ka imlang sahlang hapoh ka ri, kaba pyni ruh ba ka imlang sahlang ka iatreilang bad ka sorkar, “Ym donkam uwei ruh ban khrong ba un lah ban im”.
