Nongpoh, Risaw 30: Ki Pulit ka Ri Bhoi District hapoh ka jinglamkhmat da u Senior Superintendent of Police u Vivekananda Singh Rathore lem bad u Additional Superintendent of Police incharge Traffic Bah Orville Massar ki la bteng biang ban hiar sha surok bah lem bad la ki ophisar ban ai jinghikai ia ki nongñiah kali kumno ban burom ia ki kyndon niah kali bad ruh ban iaid ha ka liang kaba dei ban lait na ka jingpynthut ia kiwei ki kali bad ban iada na ki jingjia ba sngewsih.
Ia kane ka jingai jinghikai la pynlong ha surok NH-06 ha Umsning By-pass ha kaba ki pulit ki la bat ia ki kali heh ban hikai ia ki kumno ban iaid na ka liang kaba dei kata ka liang ka diang ban pynsuk ia kiwei ki kali kiba bud nadien ban jam shakhmat lada donkam bad ban lait na ka jingpynthut ia kiwei.
Haba kren bad ki Nongthoh Khubor, u VS Rathore u la ong, ka jinghiar biang ki pulit sha u surok bah ka long ban iai pynkynmaw ia ki nongñiah kali kumno ban burom ia ki kyndon ain niah kali bad ka jingdonkam eh ban iaid beit na ka liang ka diang ban lait na ka jingthut jong kiwei ki kali kiba bud nadien bad ban iada ruh na ki jingjia aksiden.
U la iathuh ruh, ba mynta ka sngi la hikai ia ki nongñiah kali ban iaid beit na ka liang ka diang katkum ki kyndon ain, nangta la pyniaid ruh na ka liang ka mon bad hadien la pyniaid kyllaiñ ia kine ki kali bad hadien ba la buh jingkylli ia ki nongñiah la na kano ka liang kaba pynsuk ia ki ban iaid, ki la kdew beit ba ka liang ka diang ka dei hi ka liang kaba paka bad kaba pynsuk ia ki bad ia kiwei ki nongñiah kali, u la bynrap ruh, ba la hikai ruh ia ki nongñiah ban nym pynher sted bad ban nym dih buaid haba niah kali namar kine hi ki dei ki daw bah ba wanrah ia ka jingtyngkhuh kali bad ka jingiap briew ha u surok bah.
“Ym tang ia ki kali paidbah ba ka ain ka treikam, hynrei na ka liang ka sorkar jylla ka la bthah tyngeh ia ki bor pulit ban peitngor ruh wat ia ki nongñiah ia ki kali ba shong ki heh sorkar lane VIP bad kumjuh ia ki nongñiah kali jong ki pulit ba ma ki ruh ki dei ban burom ia ka ain niah kali bad ban bud thik ia ki lym kumta ma ki ruh kin ngat ha ka jingshah pynshitom”, ong u SSP.
U la iathuh ruh, ba da ka jingtreishitom ban iai ai jinghikai bad ka jingkhynra mynta bun ki la sngewthuh ia ka rukom niah kali watla don katto katne kiba dang leh bakla hynrei shen kin sa sngewthuh, khamtam la lah ban weng noh ia ka jingdheng kali na ka thaiñ Byrnihat sha Jorabat hadien ba la ai jinghikai bad khynra ia ka jingpynieng kali kaba khlemakor da ki nongñiah trok bad kiwei kiwei, ha kaba na ka liang ki bor pulit kin nang bteng ban leh ia ka jingkhynra bad ka jingai jinghikai.
