Shillong, Risaw 30 : U Chief Executive Member (CEM) ka Jaintia Hills Autonomous District Council (JHADC) Bah Thombor Shiwat ha ka sngi Palei, ula pynpaw ba ka Council ka mynjur ban pdiang ia ka jingtyrwa ka Sorkar ba kan pynsiew tulop ia ki nongtrei hynrei kane kan long pat ryngkat ki kyndon.
“Ngin pdiang ia ka (jingtyrwa ka Sorkar) hynrei ryngkat ki kyndon” ong u Bah Shiwat haba iakren bad ki nongthoh khubor hadien ka jingialang bad u Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong, uba la kylli halor ka rai jong ka Council halor kane ka jingtyrwa.
Hynrei ula pyntip pat ba ka Council kan dang ban aiti ia ka jubab jong ka sha ka Sorkar Jylla.
Ki kyndon, u Bah Shiwat ula batai, ki iadei bad ka jingkwah jong ka Council ban pyniaid hi noh iala ki jong ki jingdon jingem kynthup ki Mines and Minor Minerals bad Transport, kiba lum mynta da ka Sorkar Jylla.
Ka Council ka kwah ban pynduna ia ka jingshaniah ha ka Sorkar Jylla bad pan ia ka jingiarap halor ka rukom pyniaid ia ka pla tyngka.
U Bah Shiwat ula pyntip ruh ba ka Council ka dang ap mynta ia ka Sorkar Jylla ban khein ia ka bhah kaba dei ban ioh ka Council. Hadien ba dep ioh ia ka jingkhein, ka Council kan sa rai ia kaei kaba ka dei ban leh.
