Shillong, Risaw 30: Ka samla Alphonsa Zinia Wriang (17 snem ka rta) na ka shnong Umsaitsning ha Ri-Bhoi ka la wanrah burom ïa ka Jylla Meghalaya hadien ba ka ioh khur ïa ka takma rnong ha ka jingïakhun Muay Thai haka lympung 3rd Asian Youth Games kaba long ha Bahrain naduh ka 22 haduh 30 tarik u Risaw.
Ka samla Alphonsa, ka khun jong u Bah Protasius Mawlong bad Kong Diamond Wriang, ka dei tang ma ka na Meghalaya kaba mihkhmat ïa ka ri India lyngba ka Muay Thai Association of Meghalaya.
Napdeng 10 ngut ki jingïakhun Muay Thai na India kiba iakhun haki kyrdan bapher bapher, dei tang ka samla Alphonsa ka ba ioh ban khur takma.
Lyngba kane ka jingjop, ka samla Alphonsa kala wanrah nam ym tang iaka Meghalaya hynrei iaka Ri India baroh kawei.
Iaka samla Alphonsa la pdiang burom da ki bahaïing hasem, ki nongkyrshan bad ki dkhot jong ka Muay Thai Association of Meghalaya ha Indoor Hall ha Umlyngkdait, Nongpoh.
Haba kren sha ki lad pathai khubor u Coach A Sun, u la pynpaw ïa ka jingsngew sarong kaba khraw ïa ka jingjop jong ka samla Alphonsa, daka ba ong ba kane ka jingjop ka dei kaba kongsan naka bynta ka kynhun, ka Jylla bad ka Ri baroh kawei.
“Ka jingjop jong ka, ka pyni ïa ka sap jong ki samla iakhun Muay Thai jong ka Jylla Meghalaya. Ngin dang ïai bteng ban pyntbit shuh shuh iaki samla khnang ba kin long kiba la pynkhreh na ka bynta ki jingïakhun ki ban sa wan, khamtam ïa ka National Games 2027” u la ong.
