Shillong, Risaw 28 : Ki Pulit Meghalaya kila kyndang ia ka kam khaii briew kaba heh bha, kaba pynbiej iaki khynnah kynthei ba kin leit sha kiwei pat ki Jylla ha ka nongrim ban iathoh shongkurim, tangba kut ha ka jingshah die.
Lai ngut ki briew kynthup u kingpin jong kane ka kynhun, kila shah kem haba iadei bad kane ka case.
Kat kum ka jingong u Superintendent of Police ka Ri-Bhoi V Rathore, ki Pulit kila register ia ka case ha u bnai Jylliew 2025 hadien ka jingjah rngai jong kawei ka khynnah na ka thain Byrnihat.
Ha ka jingtohkit, la shem ba kane ka khynnah ka don ha Rajasthan bad la die bad pynshong kurim ia ki bad uwei u briew bym lah ban ithuh ha ka jingsiew ba T. 3 lak.
Ia kane ka khynnah la ioh ban pyllait da ka jingiarap ki Pulit ka Rajasthan bad la wan ialam biang ia ka sha Meghalaya.
Ha ka jingtohkit la lap ia ki briew ba shah kynnoh- u Rajesh Hinge, Md Khalil Ali bad ka Monika, kiba donkti ha kane ka kam khaii kynthei.
Kine ki briew kila pyniajan paralok ia ki khynnah kynthei ha ki rynsan social media, pynbiej ia ki ba kin leit kai sha kiwei pat ki Jylla bad sa die pat ia ki sha kine ki Jylla. Kine ki briew kila die haduh 5 ngut ki khynnah kynthei na Assam bad kawei ka Khynnah na Tripura ha kine ki 2 snem bala leit noh.
Ki Pulit kila kyntu ia ki Kmie Kpa bad ki Khynnah ba kin husiar bad phikir bha ialade bad ban husiar haba iakren bbad kino kino ki briew ha ki social media.
“Ka jingtohkit la shem ia kajuh ka rukom pynbiej kata nyngkong la ithuh shuwa ia ki sohpdung bad sa pyniajan paralok ha ki social media kum ha Facebook, Instagram bad kiwei kiwei bad hadien ka jingia chat bad jingiaphone, la pynbiej pat ia ki ba kin leit sha kiwei ki jaka kum ha Delhi, Haryana, Rajasthan bad kiwei kiwei, ha ka nongrim ba iathoh shongkurim, leit shangkai bad kiwei kiwei bad hadien pat sa die iaki” ong u SP.
