Shillong, Risaw 23: Ka Iingdorbar ka Khasi Hills Autonomous District Council (KHADC) kala thnem puk da ka jingiatai nia hapdeng u Nongialam ka Liang Pyrshah Bah Titosstarwell Chyne bad u Executive Member (EM) Pynkhrawboklin Kharjahrih halor ka “headline (mat ba kongsan) ka kotkhubor”.
Ka jingiatai nia kala mih hadien ba u Bah Kharjahrin ula pynpaw ia ka jingpyrshah ia ka khubor ha kawei ka kot khubor ba ong ba ki MDC kila kem bitar haba shah kniehktien ha u Chairman haba iatai ia ka kam siew professional tax.
U Bah Kharjahrin ula pynpaw ia ka jingbym sngewtynnad ba ka khubor kala pynjah burom ia ka Council bad kynnoh ba ki nongthoh khubor kila pynsaphriang ia ki khubor ba bakla bad long kum ki nongkren (mouthpiece) jong ki riew shimet.
“Ngi tip ba kane ka Iing ka dei kaba pyniaid da u Chairman bad u Chairman u la shah pynkupbor da ka AD Rules. Hynrei, ka long kaba sngewsih ban iohi ia ka heading ba mih ha kawei na ki kot khubor kaba la ktah ia ka burom jong ka Council. Ka headline ka ong ba ki MDC kila kem bitar haba shah knieh ktien ha u Chairman halor ka kam siew professional tax. Kane kala ktah ia ka burom jong ka Council. Ka AD Rules kala aibor ia u Chairman. Ha ka juk social media, ngim lah ban kyntait ba ki nongpathai khubor ki don ia ka bynta kaba kongsan bha ban leh ha kabna kyntiew ia ka imlang sahlang. Nga kwah ban kyntu bad pynkynmaw ba ki nongpathai khubor kim lah ban pynsaphriang ia ki jingtip ba bakla lane long ki nongkren jongno re jongno. Phi dei ki shakri u paidbah bad lada phi pynsaphriang ia ki jingtip ba bakla, kane ka mut ba phi shukor ia u paidbah” ong u EM.
U Bah Titos ula ieng ban pyrshah, bad iasaid ba ka kam thoh khubor kam dei ka sobjek ka ban wanrah hapoh ka Iingdorbar bad ba u Bah Kharjahrin u dei ban pynpaw ia ka jingpyrshah jong u lyngba kiwei pat ki lynti.
“Lada kat kiba ngi iakren ha ka Iing, lada phi kum u Chairman phi jied ban nym pynbeit, ka kam hi kan iai sah kumjuh. Hynrei, kaei kaba ki nongpathar khubor ki thoh kam dei sati aka kam ka ban wanrah ha ka Iingdorbar. Phi don ia kiwei pat ki lynti ban pynpaw ia ka jingpyrshah” ong u Bah Titos.
Hynrei, u bah Kharjahrin ula ieng ban pynksan da kaba ong ba kano kano kaba ktah ia ka burom jong ka Council ka dei kaba don jingiadei bad ba u don ia ka hok ban pynpaw ia ka jingsngew jong u.
Ka jingiania kala nang jur haba u Bah Titos ula kynnoh ia u Bah Kharjahrin ba u la shu kynnoh ia ki lad pathai khubor bad pyrshang ban set ia ka shyntur jong ki.
“Lada phi kwah ban kren ia kano kano ka kam, kren ia ka kat kum ki rule. Kumno phi lah ban kynnoh ia ki lad pathai khubor hapoh ka Iingdorbar Thaw Ain? Phi la kynnoh pyrshah ia ki lad pathai khubor. Phi la thombor ia ka jinglong laitluid jong ki lad pathai khubor. Hato phi mut ban ong ba phi pyrshang ban set ia ka shyntur jong ki” ula buh jingkylli.
U Bah Titos ula kdew ruh ba u Bah Kharjahrin ula pyni ia ka jingbym burom ia u Chairman da kaba kyntait ban shong ha ka por ba iaid ka Dorbar.
U Bah Kharjahrin ula jubab ba u Bah Titos ula pyrshang ban ialam bakla ia ka Iingdorbar.
 kala thnem puk da ka jingiatai nia hapdeng u Nongialam ka Liang Pyrshah Bah Titosstarwell Chyne bad u Executive Member (EM) Pynkhrawboklin Kharjahrih halor ka “headline (mat ba kongsan) ka kotkhubor”.){kind=link}