Shillong, Risaw 23: Ka Synjuk ki Khlieh Nongsynshar Shnong kala aiti ia ka dorkhas ha u Symbud Myntri Rangbah ka Jylla u Bah Prestone Tynsong ban kyntu ia ka Sorkar Jylla ban kyntiew kyrdan noh ia ka Mawsynram Community and Rural Development Block sha ka Civil Sub-Division.
“Ka jingdawa ia ka Mawsynram Civil Sub-Division kadei kaba la don 20 snem mynta. Hynrei haduh mynta kam shim la urlong kumta kala pynlong ia ngi ban buddien ia kane ka mat haduh ba kan da urlong” la ong u Chairman jongka Synjuk u Bah Hiamdor Rapsang ha ka dorkhas.
“Ka Civil Sub-Division kadei ka lynti ban wanrah ia ka jingiajan hapdeng ki paidbah bad kane ka sorkar MDA kaba mynta hapoh ka jingialam ka jong phi namar ba kadei ka sorkar u paidbah bad kumta ngi don ia ka jingshaniah kaba skhem ba kane ka sorkar jong phi kan sngap bad pynurlong ia ka jingdawa ki paid nongshong shnong ka Mawsynram khlem da buh ia kino kino ki kyndon namar ka thain kadei kaba lah don lypa ia ki ophis sorkar bapher bapher bad kiwei kiwei ki kyndon kiba donkam ban kyntiew sha ka Civil Sub-Division,” ula bynrap.
Ia ka Mawsynram C&RD Block, la sdang ha u snem 1962, kadei kawei na kiba la rim tam hapoh ka jylla kaba shakri ia ki 144 tylli ki shnong kaba don ia ki paid nongshong shnong haduh 65,000 ngut. Ka jingiar kane ka Block ka long 510km, ha kaba katto katne ki jaka ki jngai haduh palat 112 km na ka district headquarter ha Shillong.
Ka Synjuk kala pynpaw ba ka jingjngai bad ka jingbym biang ki surok kala ktah jur ia ka kam pynroi bad ban ioh ia ka jingshakri kaba kongsan ban pyniajan ia ka jibgai jingshakri ka sorkar bad ki paidbah.
Ka Mawsynram kadei kaba don ia ka nam kum ka jaka kaba sngem tam hapoh pyrthei bad ka jaka jngohkai kaba la khring ia ki nongwad bniah bad ki nongwankai hynrei ki nongshong shnong ki mad ia ka jongeh namar ka jingjngai bad ki bor sorkar.
